(AP) – Un investigacion a habri riba dialuna pa examina acusacionnan cu forsanan special di Reino Uni a asesina decenas di hende homber di Afghanistan durante operacionnan den Afghanistan un decada atras, ademas di acusacionnan cu e autoridadnan a cubri actividad ilegal of a fracasa di investiga esaki adecuadamente.
E investigacion, cual a habri na Royal Courts of Justice na London, ta enfoca riba e asesinatonan supuestamente fuera di ley cu a tuma luga durante invalnan nocturno cu e unidadnan militar elite di Britain a ehecuta den e pais entre aña 2010 y 2013. Famia di e personanan asesina a bisa cu nan tabata ciudadanonan inocente cu no tabata arma y a haci yamado pa e investigacion y asina revela e berdad. Den un di e casonan, e miembronan di e famia a acusa cu 9 hende homber a ricibi tiro riba nan cama durante un inval. E ehercito Britanico a bisa cu e soldaatnan tabata actuando den defensa propio.
E investigacion ta premira cu lo tende testimonio di parti di famia di 33 persona, incluyendo 8 muchanan, kendenan aparentemente a ser asesina pa e forsanan special.
“Nos clientenan ta spera cu e apertura di e investigacion aki ta marca e fin di e ‘muraya di silencio’ y e obstaculonan cu a confronta nan durante e ultimo decada,” segun abogado Tessa Gregory ken ta representando e famianan. Su agencia, Leigh Day, ta argumenta cu entre aña 2010 y aña 2013, mas di 80 persona di Afghanistan a ser asesina bao “circunstancianan sospechoso” na man di forsanan special Britanico. Esaki a forma parti di un “custumber sistematico y amplio di asesinatonan extrahudicial contra ley,” el a declara.
Abogado Oliver Glasgow, durante su declaracion di apertura na e audiencia dialuna, a bisa cu e investigacion lo sigura cu “e personanan cu tin algo di sconde” lo tin cu para responsabel sin importa nan rango den ehercito.
