(CNN) – Presidente di Bolivia, Luis Arce, diaranson ultimo a enfrenta un intento di golpi di Estado di corto duracion, despues di yama ciudadanonan pa “organisa y mobilisa” den defensa di e democracia, mientras soldaatnan y autonan militar armored tabata rondia edificionan gubernamental na La Paz.
“Nos no por permiti cu intento golpista lo apodera un biaha mas di e bida di Bolivianonan. Nos kier pidi na tur pa defende democracia,” Arce a bisa for residencia presidencial, Cas Grandi, mientras e intento di golpi di estado tabata den marcha.
Imagennan di e luga tabata mustra soldaatnan arma reuni rond di e plasa Murillo, un di e plasanan principal na La Paz, na unda ta ubica e sedenan di ehecutivo y legislativo.
Den videonan y potretnan a mustra con un auto militar tabata pusha e portanan di palacio di Gobierno di Bolivia, mientras ex-presidente Evo Morales tabata bisa den su rednan social cu “ta preparando un golpi di Estado.” Tanto Morales como Arce ta pertenece na partido Boliviano Movimiento al Socialismo (MAS).
Momentonan despues ora e situacion a keda bao control, minister di Defensa di Bolivia, Edmundo Novillo den un conferencia di prensa a bisa cu Gobierno “tin e control absoluto” di Forsa Arma y tur cos ta controla.
E minister di Defensa a pidi un investigacion riba e “lamentabel y bergonsoso hecho” y pa lo aplica “tur sancion cu poblacion ta spera” pa esnan responsabel.
E militarnan cu a yega na Cas Grandi tabata bao mando di Juan Jose Zuñiga, ex-hefe di Ehercito cu a ser destitui di su funcion un dia prome na e hecho aki, supuestamente pa menasa di blokia e candidatura di Morales pa reeleccion. Despues el a ser deteni y a bay den un auto di polis.
Prome cu su detencion, diaranson ultimo Zuñiga a declara na periodistanan cu tabata na e plasa, “nos kier restaura democracia” mientras tabata papia di e problemanan economico di e pais.
“Pueblo no tin futuro, ehercito tin e curashi ta salvaguardia e futuro di nos yiunan, pa e bienestar y progreso di nos pueblo,” el a bisa y tambe a sigura cu “lo libera tur preso politico,” incluyendo ex-presidente di Bolivia Jeanine Añez, ken ta deteni actualmente pa loke tribunalnan ta señala cu su rol den protestanan ta loke a causa un explosion social na 2019.
Na TV Boliviano, por a mira cu Zuñiga a drenta den palacio y a bay confronta Arce ken a bisele “Mi ta su capitan y mi ta ordena pa bo retira bo soldaatnan ya cu mi no ta bay permiti esaki.”
E situacion tabata parce di a calma ora e sustituto di Zuñiga, Jose Sanchez, a ser nombra como hefe di Ehercito ken a ordena e soldaatnan cu tabata na plasa retira y bay back na nan unidad.
Minister di Gobierno, Eduardo del Castillo, a bisa diaranson den oranan di anochi den un conferencia di prensa cu e general Zuñiga y vice-almirante Juan Arnez Salvador a ser deteni pa intento golpista, pero “tin mas hende cu a planifica y conspira den e hechonan aki.”
