Impact Hub Aruba, conhuntamente cu minister di Asuntonan Economico, Comunicacion y Desaroyo Sostenible, Geoffrey Wever; Universidad di Aruba, Camara di Comercio y otro partners, ayera oficialmente a presenta e proyecto O’stad200 Incubator, dedica na startups y companianan estableci den cuadro di 200 aña di Oranjestad.

Den contexto di desaroyo di comercio nan ta conmemora e 200 aña aki trahando conhuntamente cu nan partners, por ehemplo WEB Aruba N.V y SETAR entre otro, pa establece un fundeshi hopi mas resiliente pa entrepreneurs di Aruba den e proximo añanan.

Mary-Ann Falconi-Rasmijn, ken ta fungi como co-fundador y general manager di Impact Hub Aruba, a splica cu nan ta bin trahando hopi cerca di entrepreneurs local y tambe esnan cu ta bishita e isla, caminda el a sigura cu “nos sa hopi di cerca kico ta nan necesidadnan y loke nan mester pa ta exitoso den nan trayectorio den entrepreneurship. Como parti di un organisacion global, Impact Hub Aruba ta inculca sostenibilidad como fundeshi den cada un di nos miembronan, pa asina hunto nos empodera nos entrepreneurship y haciele mas resiliente,” el a bisa.

Falconi-Rasmijn a splica cu Incubator ta nifica un programa di incubacion, unda ta duna oportunidad na startups y companianan ya estableci caba pa forma parti di e programa aki, pa asina acelera nan conocemento, duna na nan recurso, hermentnan necesario pa un periodo intensivo conhuntamente guia pa nan facilitadornan cu ta experto den industria mes, como tambe den area academico y sigura exito di nan emprendimento.

O’stad200 Incubator lo duna oportunidad pa tur industria cu ta relevante pa mercado local participa den un trayectorio intensivo di tres luna, unda cada participante lo ricibi training, tayer, oportunidadnan den network pa crea un comunidad di startups y companianan ya estableci.

Ta bay tin dos categoria disponibel, di cual e prome ta Startups, cual ta personanan cu tin idea di crea nan mesun compania, tambe ta companianan cu tin hasta dos aña di existencia. E di dos categoria ta papia di Scaleups, cual ta personanan cu ya tin un compania estableci cu ta activo riba mercado, te cu dos aña di ta activo.

E dos categoria lo tin oportunidad di drenta den O’stad200 Incubator y participa. E programa ta consisti di tres luna intensivo, despues cada participante lo mester participa den un competencia cu lo duna nan oportunidad di gana 10.000 florin, “cual ta un fondo cu lo duna un empuhe y un comienso pa concretisa nan plannan y pa nan ta un tiki mas exitoso,” Falconi Rasmijn a informa.

Tambe ta bay asigna un mentor na cada participante. E mentor ta un persona cu e comision ta scoge pa cana den e trayectorio aki cu e participante y guia nan te na e final, cu ta e competencia.

Despues di e competencia aki tin un otro trayectorio di seis luna unda cu cada participante lo continua den incubator pa sigura cu nan plannan ta ser cumpli y asina Aruba por conta cu entrepreneurs miho prepara, empodera y resiliente.

Den e conferencia aki tambe tabata presenta minister di Asuntonan Economico, Comunicacion y Desaroyo Sostenibel, Sr. Geoffrey Wever, ken a señala cu su enfoke como minister di Asuntonan Economico ta pa stimula entrepreneur y semper ta haci esaki hunto cu partners. Pa empresanan chikito y mediano lo stimula pa establece nan mes, fortifica nan mes y pa keda parti di economia. “Nos ta haci esaki pasobra empresanan chikito y mediano ta e backbone di nos economia, nan ta e parti mas grandi di full nos economia cu ta ser carga door di empresanan aki,” el a bisa.

Pa e motibo aki, minister Wever ta considera cu e tipo di proyectonan aki ta sumamente importante. “E miho ideanan pa business y pa economia den su totalidad, ta bin for di sector priva,” e minister a sigura.

E proyecto aki, cu ta relaciona na celebracion di 200 aña di e capital Oranjestad e aña aki, ta unifica e relacion cu gobierno tin cu entrepreneurs, “y ora nan a bin presenta e proyecto aki, inmediatamente nos a bisa cu nos kier ta parti di dje y nos ta contento cu nos a ser invita pa ta parti di dje,” el a sigura.

Kristen Haime, manager di Universidad di Aruba su Center for Lifelong Learning, a sigura cu nan ta enfoca riba experiencia academico pero tambe envolvimento di e comunidad. “Un incubator ta un manera hopi practico cu nos por comparti experticio cu esnan den nos comunidad pa asina haya sa ki tipo di teoria por implementa den e mercado mesora.”

Nan a haci un encuesta, screening, entre otro, pa haya sa kico tabata hopi importante pa miembronan di comunidad cu ta doño di un negoshi of entrepreneur, pero tambe nan a wak nan mesun hendenan di Universidad di Aruba como e docentenan profesional.

Den e programa aki tin 10 diferente topico, pero nan lo categorisa como business plan, marketing plan, AI, entre otro; tin aproximadamente 31 facilitador cu lo yuda e participante y 12 mentor cu ta cubri 12 industria of organisacion diferente.

E programa no solamente ta enfoca riba e participantenan, manera Haime a comenta, sino tambe den comunidad, unda nan lo tin un evento digital cu lo habri pa comunidad y lo tin dos speaker internacional, cu lo keda anuncia despues.

Di su parti, Sue-Ellen de Freita Sousa, manager business support di Camara di Comercio, a comenta cu Camara di Comercio tambe a participa cu reunionnan y a sinta no solamente cu participantenan local sino tambe stakeholders internacional pa papia di e proyecto di incubator. “Nos ta contento cu esaki ta iniciando y nos ta aplaudi e iniciativa di Impact Hub como parti di nos colaboracion,” el a bisa. Tambe el a agrega cu e “Pitch” cu lo consisti di pre-finals y den luna di november e Pitch final, unda cada participante lo competi pa gana 10,000 florin na fondo, den cada categoria.

Registracion pa O’stad200 Incubator a cuminsa ayera acaba y lo culmina dia 14 di juni caminda 15 di augustus e programa mes lo cuminsa. Pa mas informacion por bishita O’stad200 Incubator su FB page.

Pa finalisa, Bon Dia Aruba ta haci un aclaracion tocante un informacion cu a sali den nos edicion di diasabra ultimo, caminda a publica un articulo cu e titulo “Universidad di Aruba ta anuncia nan lansamento di O’stad200 Incubator dia 20 di mei.” Nos kier aclaria cu O’stad200 Incubator ta un iniciativa di Impact Hub. Universidad di Aruba ta un partner di e iniciativa aki.