(AP) – Un grupo di 2.000 migrante ayera diamars a bay back na caretera pa avansa den un caravana na sur di Mexico pa Merca, den loke algun ta considera un intento di purba yega na frontera prome cu november debi na e temor cu e crusamento lo bira mas complica si Donald Trump lo gana eleccion.
Por mira famianan completo, muhenan cu stroller, muchanan cu ta gara man di nan mayor y tambe algun adulto su so cu a cuminsa cana prome cu solo sali for di Tapachula, considera como e porta di e frontera sur Mexicano.
Centenares di migrante di varios pais a sali diadomingo ultimo for di Suchiate, frontera natural entre Guatemala y Mexico, siguiendo un convocatoria cu a cuminsa riba rednan social un par di siman atras. E resto di nan a uni na Tapachula, na unda ta constante e acumulacion di gruponan stranhero cu ta spera realisa nan tramite pa purba sigui nan caminda pa nort cu algun tipo di documento.
E formacion di e grupo nobo aki a coincidi cu e anuncio di e presidente Mericano, Joe Biden, di retira for di eleccion, aunke migrantenan ta mustra aheno na e noticianan aki. Loke nan tin mas claro ta un eventual triunfo di Trump e cual por complica ainda mas nan situacion.
Casi tur dia dozijn di persona ta sali for di Tapachula pa nort pero e formacion di gruponan mas grandi, di centenares of miles di persona ta move na sur di Mexico, loke a bira mas habitual den ultimo añanan y ta coincidi cu momentonan den cual e tema migratorio ta den agenda regional.
E caravananan aki tin biaha ta ser motiva pa e mesun activistanan. Otro, pa e mesun migrantenan cu ta cansa di warda.
Pa varios biaha, Gobierno di Mexico a bisa cu e personanan den mobilidad ta ser usa pa interesnan politico y no ta descarta cu den algun ocasion tin traficantenan cu ta probecha cualkier situacion pa gana clientenan, aunke tin casonan di famianan henter cu solamente ta busca un futuro miho, otronan nan ta huy for di violencia of pobresa den nan pais.
Normalmente, autoridadnan Mexicano ta laga e migrantenan avansa hasta cu nan mes ta cansa di cana y e caravana ta disolve.
Ayera diamars, ora nan a pasa dilanti un di e control migratorio, cu tabata cera, nan tabata grita “si se puede.”
