Sigur den e ultimo dos periodo di gobernacion, nos por a experimenta loke ta promove nos isla na nivel mundial y cu ‘bombas y platillos’. Nos a mira nos isla representa den foro internacional, na Nacionnan Uni y den conferencia mundial tocante desaroyo di teritorio chikito manera nos: e concepto di e ‘Small Islands Developing States’. Tur cos bao di e bandera di desaroyo sostenibel.

Hasta por anuncia cu Aruba a haya recientemente un premio di e revista digital Caribbean Journal, cu a reconoce Aruba como e isla mas moderno y ‘forward-thinking’ den Caribe. Esaki segun e revista ta “in large part due to the efforts of both Prime Minister Mike Eman, himself the Caribbean’s most digital-savvy politician, and the always-creative Aruba Tourism Authority. As the tourism world gets more competitive, the rest of the Caribbean will have a lot to learn from the Dutch Caribbean island.”

Awor, nos no ta skirbi tur esaki pa desmenti o bagatelisa cu Aruba ta y tin un nomber eyfo. Loke nos kier ilustra ta e contraste entre loke ta propaganda y loke nos como ciudadano cu ta biba aki y ta move rond, den auto y ohala tambe mas na pia o riba bicicleta, ta mira a base diario. Loke nos ta sinti ora nos drenta mayoria di oficina gubernamental y ta spera di tin un trato …bueno, normal. Nada di otro mundo, pero un gobernacion cu ta haci cos, ‘normal’. Cu tin por ehemplo placa disponibel pa mantene caretera. Awasero a cay, sali bay drecha loke a daña. Y no spera elogio y gradicimento, pasobra ta bo responsabilidad como gobierno.

Pero no ta trata solamente di e cayanan cu tin asfalt caba. Nos tin un sin fin di bario cu a lanta mas di binti aña pasa, y ainda no tin un metro di asfalt den henter e vecindario. Awor cu awa ta yobe tur dia, miho bo tin un SUV of pickup bieu pa pasa den e miya di buraco yen di awa cu tin. Si bo tin e mala suerte di tin un auto fini, lo bo mester sufri e consecuencia di e mal estado di e camindanan aki. Aki poco dia ora temporada di secura yega atrobe, tur e barionan aki por guli stof, te cu awa yobe atrobe. Kico pa nos lo ta ‘normal’ den e asunto aki?

Normal lo ta cu un gobierno tin un ministerio di infrastructura cu tin seccion di planificacion cu nan ta tuma na serio, cu ta planifica con sistematicamente e barionan aki ta haya e infrastructura cu nan merece. Probablemente si prensa acerca nan, lo nan bisa cu si nan tin plan, nan ta ‘bezig’, djis warda un rato… Pero no ta trata di e pregunta si algun dia a yega di traha un diseño pa caya y acera pa tal o cual bario, e pregunta ta si a planifica, un tras di otro, ki dia nan ta den presupuesto pa parlamento aproba y por cuminsa haci esaki bira realidad.

Y nos no a menciona traha acera pa casualidad. Aki 13 aña, mas o menos un cuarta parti di nos  poblacion lo ta na edad riba 60 aña. Mas y mas nos lo mester inverti den un infrastructura habitacional cu ta permiti nos ciudadanonan move cu familiar cu ta den rolstoel. Pregunta: cuanto di nos, for di nos cas, por subi caya comodamente, na pia o cu rolstoel? Te unda nos ta yega? Hasta e barionan mas bieu cu di antaño tin acera, hopi di nan ta den un estado pesimo cu bo mester ta den bon condicion fisico pa bo cana riba nan sin mayor percancia; no algo pa nos grandinan. Esaki ta algun di e cosnan ‘normal’ cu como ciudadano bo ta spera di tur gobierno, sin distincion di color politico, cu nan ta reconoce como nan tarea y hacie, punto!

Igualmente e topico cu ta den publicidad hopi, recogemento y procesamento di desperdicio di cas. No ta bay pa trata e tema aki di nobo, pero nos por bisa cu a duna prioridad na e problema aki, cu nos por considera algo ‘normal’ cu mester keda regla, nada mas? Pakico anto no ta haci tur e cosnan ‘normal’ aki y di baina tin critica cu e no ta sucede, cu excepcion di esunnan cu ta afecta directamente? Pakico no tin mas presion for di opinion publico mes pa obliga gobierno(nan) asumi nan responsabilidad pa e cosnan ‘normal’ aki? Por ta cu nos mes gusta ora cu hopi entusiasmo politiconan ta bin conta nos con nan ta bay pone Aruba riba mapa mundial, con nan lo percura pa Aruba bira e isla na vanguardia den nos region, mientras cu den e ultimo dos periodo di gobernacion tin otro isla a progresa y nos no?

Ki bal nos ta riba mapa mundial cu premio di hende o instancia cu aparentemente no sa kico a keda realisa na Aruba mes? Lo no ta miho cu pa e proximo campaña aki, nos pone propaganda un banda, y exigi mas atencion pa e cosnan ‘normal’ cu mester ta bon regla den un pais ordena?