Mediante un comunicado di prensa e Colegio di Hefenan di Polis a informa cu den un situacion unico, funcionario di tur cinco cuerpo policial den Reino di Hulanda a reuni na Corsou pa e proyecto piloto War Room Estrategia di Reino. E iniciativa aki tambe ta inclui participacion di e Recherche Samenwerkingsteam (RST), Koninklijke Marechaussee (KMar), y e Guarda Costa di Caribe Hulandes (KWCARIB).

E comunicado ta remarca cu e paso importante aki ta dirigi pa fortifica e cooperacion entre autoridadnan di ley pa combati criminalidad transnacional y criminalidad cu ta mina e sociedadnan na e paisnan den Reino Hulandes.

E War Room ta bou di liderazgo di e coordinador di e Plataforma di Coordinacion di Informacion Interinsular (IICP); locual ta un cooperacion structural entre e organisacionnan participante y Ministerio Publico (OM), enfoca riba maneho y intercambio di informacion. E coordinador ta haya sosten di e oficial di enlace di Polis Nacional Hulandes y di coordinador di coordinacion di Informacion Caribe Hulandes (ICC-NL).

E comunicado ta splica cu e termino ‘war room’ ta bini di mundo militar, referiendo na un espacio central pa desaroya strategia y coordina operacionnan. Durante e dos siman di e proyecto piloto – di 31 di maart te 11 di april 2025 – analista y expertonan deninformacion lo traha intensamente hunto pa identifica y analisa rednan criminal cu ta activo den mas cu un pais den Reino. E productonan di informacion cu ta sali for di e colaboracion aki por sirbi como base pa investigacion penal of otro tipo di intervencion.

E proyecto piloto ta sirbi tambe como training practico pa e analistanan nobo den Cuerpo Policialnan Caribense y RST.

Na nomber di e Colegio di Hefenan di Polis, e War Room a ser inaugura oficialmente pa Hefe Policial di Corsou,Raymond Ellis, hunto cu Ans Rietstra, Hefe di RST. Segun Ellis, e iniciativa aki “ta un fase nobo den cooperacion den Reino.”

Segun e Hefe di Polis: “No ta un coincidencia cu nos a eligi pa traha den un War Room. E lucha contra crimen organisa ta parce un guera moderno. E lucha ta tuma luga den waf, aeropuerto, riba caya y tambe riba internet. Nos oponentenan ta bon organisa, ta colabora sin problema pafo di frontera, ta usa tecnologia sofistica y tin un posicion fuerte di informacion. Esaki ta nifica cu nos tambe mester organisa nos mes miho, traha hunto sin limitacion y fortifica nos mesun posicion di informacion.”

E Hefe di RST a expresa su aprecio y sosten pa e proyecto, y a bisa cu e tin confiansa cu e War Room lo trece resultadonan util i importante.

E iniciativa aki ta demostra cu e instancianan di mantencion di ley den henter Reino no solamente tin e deseo pa combati crimen organisa, pero tambe ta pone deseo aki den accion concreto. E no ta solamente un proyecto piloto, e ta un señal fuerte di union, demostrando urgencia den e lucha contra criminalidad cu ta mina e sistema.

Ta spera cu e metodo cu ta ser desaroya durante e simannan aki, lo sirbi como base pa un cooperacion duradero y structural den futuro.