E debate politico reciente na San Nicolas, organisa pa e San Nicolas Business Association (SNBA), a pone hopi enfoke riba proyectonan grandi di infrastructura. Pero e pregunta ta si esakinan ta realmente yuda e comunidad cu su problemanan di berdad. Hopi hende ta wak esakinan manera un show visual, mientras cu e problema di miseria, hamber, y falta di educacion ta keda sin soluciona.

Un di e puntonan mas fuerte di e debate ta cu infrastructura grandi no por wordo considera como e solucion pa tur problema. E pregunta ta si construccion di caya grandi ta un ilusion pa mustra progreso, mientras cu hamber, miseria y falta di educacion ta sigui ta presente. Un caya grandi sin un base di comunidad cu por sosten’e ta un proyecto bashi, diferente di ciudadnan manera Medellin cu tin mas di 4 miyon di habitante pa sostene e tipo di inversionan manera esaki.

Preocupacionnan social a lanta fuerte den e debate, particular riba seguridad. Un pregunta sin contesta ta si un señora por sinti su mes “safe” pa pasa den un caya grandi cu ta rondona di barnan cu ta opera den prostitucion y cu den ultimo decadanan ta parce ta doño di caminda publico. E tipo di ambiente aki ta cuestiona si e desaroyo infrastructural ta realmente mehora e bienestar di e comunidad.

Otro punto di critica ta e gasto inmenso di limpia e tereno di e refineria, cu ta calcula rond di $500 miyon. E decision di MEP pa kibra contract cu Citgo librando e di su obligacion sin ningun beneficio real pa e comunidad, ta pone duda si tabata un decision responsabel di parti di gobierno. Un gobernante responsabel no lo a laga e empresa aki bay sin a haci e terenonan aki limpi. Pa es motibo, awe nos ta sinta cu un tereno contamina y lo rekeri di inversionan multi-miyonario si nos kier haci uso di esaki pa desaroyo. Mas di 1 miyon meter cuadra di tereno para sin un plan di redestinacion y sin e fondonan necesario pa redesaroya esaki.

Pa sigura cu e tipo di proyectonan infrastructural proponi por realmente sirbi e pueblo, e prioridad mester ta drecha e situacion di bida di e habitantenan prome. Tin hende cu ta muri di hamber, muchanan ta ‘slenter’ riba caya pa falta di atencion debido di mayor y instancianan gubernamental. Sin trece solucion pa esakinan, e idea di un caya grandi ta keda un promesa bashi.

E sugerencianan ta inclui: duna alivio pa pensionadonan pa nan no paga impuesto riba nan pensioen basico; pone institucionnan manera DOW, DIP, Kadaster, y otro pa opera cu mas eficiencia y basa riba merito; redirecciona fondo di ATA pa e caha di gobierno y usa e diferencia pa infrastructura; y ahusta ley pa cu Airbnb paga su parti husto di impuesto. Tambe ta sugeri un aumento di 8% di e salario minimo y 10% na pensioen pa duna mas stabilidad economico y sosten pa e habitantenan. E eleccion aki ta un spiel di loke a pasa na Merca cu su mesun similaridadnan.

Un di e pregunta cu Bon Dia Aruba lo kier haci na e politiconan den e contienda eloctoral aki ta: Kico ta bo plan ta pa drecha e posicion economico di e ciudadanonan y contraresta e inhusticia economico cu ta asotando nos hendenan? Nos ta tribi di yuda e politiconan cu algun sugerencia:

  1. Implementa ley pa pensionadonan no mester paga belasting riba nan pensioen primario di gobierno. Si nan tin otro pensioen, nan mester paga riba eseynan.
  2. Bin cu profesionalnan pa pone DOW, DIP, Kadaster y DNM funciona a base di productividad y eficiencia. Si e directornan actual no ta funciona, cambia nan y usa meritocracia (basa riba merito).

3. Mirando e gran exito di Aruba como destinacion turistico pa mas cu 3 decada, mester reconsidera pa reduci e fondonan cu ta destina pa mercadeo na 40 miyon y redestina 100 miyon restante di e fondonan, cu por usa estrictamente pa drecha infrastructura di Aruba (camindanan) cu ta den un estado deplorabel, invocacion y training di maestronan pa por cumpli cu e necesidadnan di e futuro di nos pais.

  1. Mester soluciona y bin cu ley pa tur “Airbnb” paga nan fair share, pero mester sigura cu tin manera pa “enforce” e ley, dus mester cobra tambe.
  2. Ahusta e ley di grondbelasting unda ta pone tur e condominionan paga a base di e balor di compra y benta manera nan ta haci cu tur hende.
  3. Reduci e IB Tax cu cierto porcentahe pa tur categoria.
  4. Hisa pensioen 10%.
  5. Hisa nummerplaat belasting cu 15%.
  6. Implementa RWZI cu no mas di 75 miyon. E 20$ tourist tax ta suficiente pa cubri esaki si financia e proyecto pa 30 aña na interes di 3% for di Hulanda.
  7. Hisa e minimumloon cu 8%.
  8. Recapacita e aparato gubernamental pa asina por brinda servicio adecua y crea espacio pa actualisa nos proceduranan y leynan conforme situacion presente.
  9. Renegocia of termina e contract cu Astec den luz di pone mas bida na San Nicolas.

Esakinan ta sugerencianan cu por duna un direccion pa un cambio structural, enfocando riba mehora bienestar di e pueblo y un desaroyo sostenibel pa e comunidad di Aruba.