Satisfaccion cerca e organisadonan di e marcha di diahuebs atardi, cu a yega na un cantidad bastante pa impresiona. Y e reaccion di gobierno tabata di inmediato. A yega na un acuerdo cu Prome Ministro a firma su so un compromiso cu gobierno lo duna prioridad na combati criminalidad, ta pone 10 miyon florin disponibel den presupuesto 2017 pa Husticia y ta pone mas polis riba caya.
E pregunta ta dicon e biaha aki si gobierno a reacciona asina directo mientras cu na otro ocasion ta tuma un manifiesto y ta lubida cu e ta existi. Como un manera tactico pa handle e asunto, e ta haci gobierno mustra diligente y dicidido. Naturalmente mester mira con finalmente ta maneha e asunto. A cuminsa bon caba, pasobra aparentemente Prome Ministro tabata di pone un rueda di prensa ayera mainta pero esaki no a tuma luga. Cu e presupuesto cla pa keda trata den parlamento, ta interesante pa haya sa ta na kico e dies miyon extra lo bay. No por ta cu atrobe e ministro di Husticia ta bisa cu e tin un plan pero e no por laga niun hende mir’e pasobra ‘e ta confidencial’. E gobierno aki a descubri e opcion inmoral pero efectivo di nenga documento, violando constitucion, sabiendo cu oposicion no tin luga pa reclama. Nan no por bay hues, nan no por bay Ministerio Publico, nan no por haci nada den parlamento.
Otro aspecto ta cu gobierno a logra pone e prome 5 miyon caba. Miho dicho, e bon samaritano di Turismo kier a mustra su bon curason y a laga aproba un suma di cinco miyon pa otro aña di e fondonan di Aruba Tourism Authority. Esey ta mustra masha bunita pero no ta resolve e problema di principio cu tin. Y esey ta cu a permiti crea un structura di financiamento pa e institucion aki, cu ta exagera y ta limita e fondonan general cu mester ta na disposicion di gobierno. No ta suficiente pa haci peticion na e ministro di Turismo pa mustra bon boluntad y pone placa disponibel pa otro ministerio. Di e manera aki nos ta creando un gobernacion dentro di gobernacion cu ta dicidi riba su mes pa dedica fondo na otro tarea di gobierno cu no ta cay bao di e ministerio ey mes. Ningun ministro, y atrobe nos no ta bisa esaki pa simpatisa cu ministro di Husticia, no por acepta pasobra simplemente e asunto aki no ta cuadra cu gobernacion drechi. No por ta asina cu un ministro ta hay’e obliga di bay na rudia cerca un colega pa haya placa pa su ministerio, punto.
E ta keda un problema ora un ministro tin placa di mas anto e por bisa su colega cu:”mi por yudabo, pero bo tin cu bisa mi si na kico bo ta bay gasta e placa”. Y e argumento cu e ta uza pa exigi esaki ta cu e mester hustifica den presupuesto di ATA pakico ta uza e placa ey. E no por simplemente duna su colega un blanco cheque di cinco miyon, e ta haya problema grandi di aprobacion cu su accountant cu mester revisa e bukinan di e institucion.
E problema ta sigui mas leu ainda,pasobra ora e presupuesto bay parlamento, mester pone e cinco miyon ey acerca, o e ta cay bao di e capitulo di ‘donacion’? E ministro a duna cuenta caba cerca su colega pakico e placa ta, anto e mester duna cuenta na parlamento tambe? Ban supone cu un miembro di parlamento no ta di acuerdo cu e destinacion cu a duna na e cinco miyon, e por critica esey? E por pasa un mocion pa cambia e meta na cual e placa ta destina? O mester bisa cu e parti financia pa ATA ta cay pafo di responsabilidad y tambe di autoridad di parlamento?
Hopi aña pasa, tempo cu e actual ministro encarga cu turismo tabata un parlamentario ainda y e tabata ‘shop around’ cu su modelo di independisacion di ATA, un di e miho huristanan cu Aruba a conoce, a conseha contra e aventura aki, y el a describi exactamente loke ta pasando awor, cu tin placa publico hinca den pochi apart unda parlamento no tin nada di bisa, haciendo daño na e medionan disponibel pa gobernacion en general.
Finalmente, si nos scucha loke ta e plan pa kico ta bay uza e placa extra aki, tur ta pa medida di represion. Ta papia si bunita di prevencion, pero nos no ta mira ni tende un discusion sano tocante e medidanan cu mester tuma pa yega na combati criminalidad na un manera structura. Lo ta bon si parlamento den su totalidad por hisa nan mes na nan cabey na un nivel digno di discusion y sikiera pa un biaha delibera riba e asunto aki y yega na conclusion cu ta make sense. Un punto positivo nos por nota caba si: e responsabel pa ley, di orden y siguridad publico a tuma rienda di e asunto y no ta laga esaki mas na su colega di Husticia. Spera cu nan no ta bay bringa si.
