Un fin di siman yena cu cultura y musica; Festival un Canto pa Aruba su Himno y Bander tey back

Den fin di siman aki lo tuma luga e festival Un Canto pa Aruba su Himno y Bandera. E fin di siman lo ta uno cultural caminda lo tin presentacionnan ariba Plaza Libertador Betico Croes ariba diabierna, diasabra y diadomingo.

Durante un conferencia di prensa na Plaza Libertador Betico Croes, Arron Arenas, organisdo di festival, a duna informacion ariba tur locual ta bay tuma luga durante e fin di siman aki pa celebra Aruba su luna cultural y den antesala pa celebracion di dia Himno y Bandera, 18 di maart.

“Nos ta preparando un scenario mahestuoso pa loke ta e fin di siman cultural aki, cu ta nos luna cultural, luna di nos himno y bandera, luna di nos 18 di maart caminda nos ta celebra y nos ta sali como un bon Arubiano pa celebra y disfruta di loke ta nos luna cultural”, Arenas a bisa.

Festival un Canto pa Aruba su Himno y Bandera categoria infantil, hubenil y adulto ta bay door y lo tin un total di 40 cantante y 16 agrupacion musical. Esaki ta wordo parti den dos dia cu ta diasabra cinco di maart y diadomingo seis di maart.

Arenas a splica cu diasabra cinco di maart ta e festival di categoria infantil y hubenil unda cu tin un total di 20 cantante y seis agrupacion muciscal cu lo presenta y esaki lo cuminsa 7or di anochi y lo temrina 12or di marduga. Diadomingo seis di maart ta e festival di categoria adulto cu lo tin 20 cantante, 10 agrupacion musical y lo cuminsa 6or di atardi y lo termina 12or di marduga

Awe diabierna cuater di maart lo tin un concierto nacional cultural cuminsando 7or di anochi ariba Plaza Libertador Betico Croes cu lo wordo presenta pa Edjean Semeleer hunto cu un elenco di diferente artictanan local cu lo deleita pueblo di Aruba cu cancionnan cultural.

Manera ta custumber lo tin diferente tentanan ariba Plaza Libertador Betico Croes y Arenas a informa cu e fin di siman cultural aki lo tin 40 tent ariba plaza cu lo ofrece un variedad di cuminda, bebida, artesania local y hopi mas.

“Despues di dos aña nos por bin back ariba Plaza Libertador Betico Croes y esey ta haci nos di organisacion feliz y nos ta hopi emociona pa por disfruta y deleita pueblo di Aruba pa loke ta trata tur locual ta e celebracion di nos dia nacional, nos dia di Himno y Bandera”, Arenas a expresa.

Inicialmente e festival lo a tuma luga di manera virtual, pero Arenas a splica cu despues cu Gobierno di Aruba a anuncia eliminacion di tur medida di COVID-19, nan a cuminsa traha di biaha pa loke ta e festival y pone back caminda e tabata custuma di tuma luga.

“Nos a traha duro den e tiki tempo cu nos tabatin pa cambia full e sistema di e festival mirando cu nos mes como organisacion a premira cu e ta bay ta virtual, pero aworaki nos ta back na unda cu nos ta gusta”, el a agrega.

Arenas a enfatisa cu drentando back den normalidad, e festival lo tuma luga manera custumber caminda lo tin stoelnan disponibel pa publico y ademas di esey personanan por trece nan mesun stoelnan, nan jugnan y sinta disfruta di tur e presentacionnan.

Pa loke ta e premionan, Arenas a splica cu e ganador absoluto di e festival den e categoria adulto lo ricibi cinco mil florin, segundo luga ta gana tres mil florin y tercer luga ta gana mil florin. Den e categoria infantil y hubenil tur mucha ta haya premio, medaya y certificado.

Pa finalisa Arenas a extende invitacion nah enter pueblo di Aruba pa pasa disfruta di e fin di siman cultural y apoya tambe tur e participantenan cu lo competi den e festial Un Canto pa Aruba su Himno y Bandera.