![Russia Ukraine War Atlas Festival](https://www.bondia.com/wp-content/uploads/2024/07/Fanaticonan-artistanan-y-soldaatnan-ta-ser-uni-pa-e-guera-inescapabel4_result-696x464.jpg)
(AP) – E aña aki, Ucrania su festival di musica mas grandi a bolbe. Sin e artistanan internacional y e escenarionan grandi cu miles di persona den e audiencia.
Na luga di esaki, e pais su artistanan local mas stima a subi escenario e fin di siman aki na Atlas Festival pa e audiencia. E stage a ser lanta den e parking lot di un centro comercial, e unico opcion cu espacio suficiente pa contene e mas di 20,000 persona premira den caso cu un atake aereo tuma luga.
Hobennan a baila, canta den compania di soldadnan y comandantenan di ehercito mientras cantantenan tabata duna un concierto cu letranan yen di orguyo nacional. Musica tabata e meta principal, pero tambe kibra e ilusion cu e capital no ta vulnerabel na e bataya sangriento cu ta andando kilometernan leu.
“E tipo di festivalnan aki no por ser separa for di e bida di e pais. E pais ta den guera. E problemanan den su fundeshi ta relaciona na e guera,” Vsevolod Kozhemyako, un negociante y un di e fundadornan di Khartia Brigade, awo parti di Urcania su Guardia Nacional a comenta.
“Hendenan cu te ainda ta hoben y no uni e lucha mester compronde cu nan no por biba den un bubble,” el a comenta. Sinembargo, un bubble ta exactamente con e ta sinti pa ta na Kyiv, mientras cu e guera ta acerca su di 3 aña. Mientras cu soldadnan di Ucrania ta fayece y ser herida tur di aña e parti oost di e pais, e capital ta un contraste cu su barnan y clubnan nocturno druk y yen.
Cada pasa un tempo, Kyiv ta para cara a cara cu e guera. Dos siman pasa un cantidad di misil Ruso a destrui un hospital y clinica priva di mucha, den un di e atakenan mas mortal desde e invasion di escala completo. Residentenan ta luchando cu blackout causa pa Moscu su destruccion di generacion di energia di Ucrania na haltura di un ola di calor.
Den tur skina di e festival, prome biaha cu esaki ta ser organisa desde cu e invasion a cuminsa, e bishitantenan ta confronta cu e realidad incababel cu nan pais ta pega den un guera sangriento. E organisadornan di e festival tabatin e speransa di por recauda 2.2 miyon dollar pa yuda e soldadnan cumpra herment pa usa den e guera.
Den e parking lot di e entro comercial, varios unidad militar di Khartia 3rd Assault a ofrece weganan interactivo pa atrae donacionnan y posiblemente recluta hende. Un wega di tiro a ofrece e bishitantenan e chens pa mehora nan maneho di arma. Den otro skina, mediconan tabata decora mannan of pianan di plastic y a ofrece training medico pa situacionnan di emergencia.
E festival a conclui diadomingo cu un presentacion anticipa di Serhii Zhadan y su banda Zhadan and Dogs. Zhadan, un artista celebra cu ta yama e poeta di Donbas, recientemente a uni Khartia. “E ta un break chikito, un oportunidad pa hala rosea,” el a bisa prome cu el a subi stage. “E cosnan mas importante, nan ta pasando aya, unda e bataya ta tumando luga.”
Riba escenario, Zhadan a cuminsa cu un di su cancionnan mas stima “Malvi” of “Mallow”. E audiencia a canta cune palabra pa palabra. “Ki bop or haci awo cu mi sanger cayente?” nan a canta. “Ken lo bin contra nos?”
Pa Nadiia Dorofeeva, un di Ucrania su cantantenan mas famoso, cada concierto ta sinti diferente. “Antes, cada biaha cu mi a subi un escenario mi tabata pensa si mi ta mustra bon, si mi lo canta bon y si e hendenan lo ricibi loke nan a bin busca. Pero awo, mi ta spera cu no lo tin alarma. Mi ta mira con hende ta yora na mi conciertonan.”
Entre e personanan cu a atende e concierto tabata Lt. Gen. Serhii Naiev, un hefe diputado assistent den Ukraine General Staff. “Nan ta artistanan conoci riba escenario, nan ta dunando nan conciertonan y tin hopi persona di Ucrania cu ta dunando nan placa den donacion, placa cu ta hopi necesario pa e forsanan arma di Ucrania,” el a comenta.
“Nos ta compronde cu nos partnernan ta yudando nos, pero tambe nos ta compronde cu nos por haci hopi di nos mes, pa ta aun mas fuerte,” el a declara.