Si bo a yega di keha cu bo mester a keda drumi den aeropuerto despues di un delay, pone bo mes den sapatonan di un famia di Zimbabwe cu finalmente por a bay cas despues di biba na aeropuerto Suvarnabhumi na Bangkok pa un periodo di tres luna.
E famia – cuater mucha bao edad di 11 y cuater adulto – a yega Bangkok den luna di mei 2017. Nan no por a drenta legalmente na Thailand mirando cu nan a keda mas largo cu stipula cu nan visa di turista anto mester a paga un multa. Pero nan a bisa nan no por a regresa Zimbabwe pasobra eynan nan tabata wordo persigui. E situacion di e famia a bin dilanti despues cu un empleado di e aeropuerto a pone un potret hunto cu e famia den december bisando cu nan ta bibando eynan pa e situacion fastioso cu nan tin na cas. Oficialnan a splica e tempo ey cu nan a purba di yuda e famia haci algun areglo cu Ukraine International Airlines pa bula via Kiev pa Dubai – y despues pa un otro pais – sin mester pasa imigracion Europeo.
Pero segun vocero di UIA, e famia cancela nan vuelo anto nan a wordo manda bek Bangkok for di Dubai.
E famia a pidi asistencia di Nacionnan Uni bisando cu nan tin miedo di persecucion na Zimbabwe despues cu den november yen di problema a cuminsa bin dilanti relaciona cu lider Robert Mugabe y pa bah’e for di poder. Nacionnan Uni a laga sa e tempo ey cu nan tabata explorando algun opcion pasobra Thailand no ta ofrece status legal na refugiadonan y esnan buscando asilo.
Fuente: BBC
