Fundacion Biba Bou Guia a tene un evento di celebracion. E evento tabata pa trece ‘alegria y felicidad’ na persona cu limitacion y pa nan por sinti cu nan ta forma parti di comunidad.

Presidente di fundacion, Dalgis Montalvo, a bisa cu a dedica e dia pa nan cliente. E fundacion tin 20 aña di existencia. Nan cliente ta persona cu condicion mental, limitacion psikiatrico cu nan ta duna atencion. Montalvo ta bisa cu no ta straño cu tin reto pa e parti social.

Tin caso cu nan ta haya cliente asina urgente, cu nan tin cu move di tur forma pa por duna e cliente locual e mester; e momento cu aporte di cada trahado di otro instancia, departamento di asunto social, Respaldo pa asina ‘duna cliente loke mester’.

Sinembargo Montalvo ta expresa cu no ta duna mucho ‘spotlight’ pasobra ta respeta privacidad di cliente. “Nos ta traha hunto cu FCAA, cu ta esunnan cu ta provee e cas pa nos cliente. Pero awo ta importante pa tin un actividad diferente. Pa e motibo a organisa un evento cu mariachi cu nan gusta tende cu topico di Mexico.”

Montalvo a bisa cu miembresia a crece durante e aña. Actualmente nan tin 31 cliente y tin un lista di espera, ‘e ta lamentabel, pero reto ta grandi’. Edad cu e fundacion ta traha cune ta adulto di 18+, tin cierto cu ta yega mas hoben, pero mas tanto adulto.

Minister di asunto social, Glenbert Croes (MEP), a bisa cu sector priva y gobierno tin como meta pa enfatisa atencion pa grupo di persona cu limitacion y duna alegria na e grupo. A haya cooperacion di varios luga pa por a haci e evento en cuestion posibel.

Croes a bisa cu e fundacion ta duna cierto guia na persona cu limitacion pa nan por biba un bida semi-independiente, pero cu un guia. Fundacion Biba Bou Guia tin diferente districto y bario cu ta haci e trabou.

“Un evento asina ta pa persona cu limitacion sinti nan mes stima, cuida y cu ta worry cu nan. Nos kier pa alegria cu ami cu bo tin derecho den nos bida, pa nan tambe tin e mesun derecho riba dje. Nos kier aporta esey”, Croes a expresa.

Den pasado ta conoci cu hende cu limitacion tabata scondi, neglisha, isola y ‘awo nan kier sali’. Segun mandatario, cada persona tin derecho pa un bida cu alegria y felicidad, cu derecho pa deleita y pa es motibo a coopera cu evento.

El a comparti tambe cu e evento tabata na Jaburibari, pero nan lo keda bay tur caminda. “Si tur sector bay hunto por haci cosnan importante riba tereno social. Pa e cliente di e fundacion sa cu nan ta nos ruman cu mester atencion y cariño.”

E mandatario tambe a informa cu tin diferente hende cu limitacion di cualkier forma cu ta afecta pa droga, trauma, problema mental y psikiatrico. E ta bisa cu ta necesario pa continua cu e Crisis Plan Social.

“Na Aruba y den Reino nos ta compronde cu e crisis ta real. Nos ta bibando e y a dicidi pa atende cu plan di emergencia. Ta tuma cosnan chikito pero tambe proyecto grandi cu mester haci pareu”, el a bisa.

Pa baha e presion di emergencia, mester planifica y sincronisa, segun e mandatario. El a bisa cu realidad di exito den e Crisis Plan Social ta pa tur sector social dicidi di uni cabes y actua tras di un plan y vision. “Mi tarea ta compromete cu apoyo y fondo pa pone presion positivo pa mira progreso”, Croes a finalisa.