“51% di ciudadano di Latino America ta evalua malo e trabao di nan congreso”. Mas di 25 organisacion di sociedad civil ta impulsa, bao lema di #DileAlCongreso, e prome consulta riba trabao legislativo na 15 pais di Latino America E obhetivo ta haya sa cual ta e grupo di factor cu ta importante pa tin legitimidad den trabao legislativo na Latino America. “Ta falta di confianza?, ta falta di informacion?, ta ausencia di duna cuenta di placa cu ta di estado? Nos idea ta identifica e motibo y cu estudio aki por sirbi pa asina traha riba diferente plan di accion,” Agustina De Luca, Director di Area di Transparencia di Fundacion Directorio Legislativo, a splica.
Segun De Luca Latino Americano tin interes pa agenda legislativo, pero e interes ta fragmenta. “Hende ta sigui topico, debate of proyecto di ley pa motibo cu e ta interesante pa nan of pasobra nan ta sinti nan interes afecta. Importante ta cu congresonan por ta un espacio caminda por introduci demanda of problema cu tur sociedad tin y cu e pueblo por sinti cu ta haya atencion pa nan problema,” De Luca a splica. E consulta ta impulsa via red socialnan, y ta tuma opinion di ciudadano di Argentina, Bolivia, Chile, Colombia, Uruguay, Ecuador, Venezuela, Republica Dominicana, Costa Rica, Mexico, Guatemala, Peru, Paraguay, El Salvador y Honduras.
Aunke e resultadonan no lo tin caracter di un muestra, nan ta anticipando un participacion masal di mas di 600 mil persona di tur pais. E obhetivo ta mehora e funcionamento den congresonan regional. E encuesta tin 10 pregunta y ta anonimo, y ta tocante trabao den congreso, legisladornan, representacion real cu ciudadano kier tin den congreso, topiconan cu mester bira prioritario na momento di legisla.
Topico manera seguridad, delincuencia, educacion, inflacion, derecho sexual y reproductivo, corupcion y igualdad di genero entre otro. Ciudadano di pais envolvi den e iniciativa aki tin tempo pa participa den e LINK aki te dia 9 di juli.
