Pashent cu Multiple Sclerosis:

Den parti di Salud Bon Dia Aruba a acerca dos pashent cu ta sufriendo di un malesa cronico cu yama MS, esta Multiple Sclerosis.

MS no ta hopi conoci na Aruba of en caso tin scondi.

Prome pashent cu Bon Dia Aruba a haya oportunidad di entrevista ta Eliza Vivas. Sra. Vivas ta splica nos cu dia 19 di september 2017, e tabata core auto trankil cu e la sinti un sorto di nubia cu manera yen strea ta tapa su bista anto poco poco e tabata bira mas scur.

E la pensa cu porta lo ta algo di un rato te ora el a ripara cu dianan tabata pasa anto niun cambio den su bista, eynan e la dicidi di bay su dokter di cas.

Sra.Vivas ta splica nos cu e proceso di su dokter di cas te specialista tabata uno cu a bay facil pa motibo di urgencia. “Nan a duna mi un verwijsbrief pa specialista di wowo, pero eynan specialista a bisa mi cu mi caso no tin nada di haber cu wowo”, e la continua.

Despues di esaki sra.Vivas ta splica nos cu e la bay neurologo pa haci un check na su cerebro. Na hospital nan mester a haci un MRI scan y un ‘lumbar punction’. Ora nan a bisa esaki el a haya un miedo paso ta un likido nan tin cu saca for di su lomba.

Sra. Vivas ta splica cu e no a opta pa tuma e lumbar punction, el a djis haci un MRI scan anto e diagnostica a bin na cla cu e tin MS. Pero hospital y neurologo a recomenda e pashent si e kier ta mas sigur miho e sigui e procedura di lumbar punction.

Un cos cu sra. Vivas tin di bisa cu el a haya su steroids, pero ‘mi a keda disgusta ora mi a haya mi resultadonan, niun hende no a splica mi nada’. “Nan a duna mi un CD cu informacion di resultado sin niun splicacion, sin bisa ami dicon e motibo di e malesa aki.”

Segun sra.Vivas, e no ta haya un bon manera cu neurologo no a splica nada. Sra. Vivas mes mester a paga pa un otro neurologo pa asina por a haya un splicacion y informacion mas adecua.

Sra. Vivas a bisa cu un di e neurologonan a djis manda un inyeccion sin tampoco duna un splicacion cu e tin cu inyecta cada siman. Awo sra.Vivas ta splica cu e tin miedo di haci esaki riba su mes.

“Si nan lo a splica mi con mi tin cu inyecta, of mester bin cu un medio mas facil pa esunnan cu tin miedo di inyeccion. Awo ami tin cu paga cada siman pa Wit Gele Kruis bin inyecta esaki pa mi.”

Segun sra.Vivas, e no a recupera su bista nunca mas. Anto e inyeccion -segun sra.Vivas- ta haci un efecto pio pa su wowo. E neurologo cu el a paga pe ta recomenda pa bay otro pais pa asina e por haci un check up miho.