Ayera tabata e delaster dia pa paga number di auto. E panorama di ayera pafo di oficina di belastingkantoor na Camacuri tabata mescos cu e ultimo dianan. E rij di clientenan pafo di edificio tabata largo, caminda nan mester a warda casi dos ora prome cu nan por a haya un number pa paga e impuesto riba vehiculo di motor of otro sorto di impuesto.
Pero tambe e disgusto y frustracion di e clientenan tabata mescos cu e ultimo dianan. E ambiente den e servicio di caha di pago di impuesto den diferente oficina di gobierno tabata mescos, ya cu e cantidad di number tabata limita na 125 so.
Comentario di clientenan
Romeo Croes ta un cliente cu a expresa na Bon Dia Aruba su disgusto na pa e mal servicio y falta di informacion di SIA. El a bin ayera pa para den rij banda di 7or y mey di mainta y 10or a bati y ainda e tabata para den rij. E caso di dje ta similar cu e otro clientenan para den rij. Pero esaki no tabata e prome biaha cu Romeo Croes a bay para den rij, ya cu ayera tabata e di cuater biaha cu el a bay belasting kantoor, perdiendo practicamente full un dia di trabou. El a bisa cu e informacion poni den media no tabata cla; y ora e ta yega na caha, nan ta bin bisa cu ta falta tal papel of tal papel. E historia aki a ripiti varios biaha, y ora cu e ta bin bek e no ta haya number. “Nos ta faltando full un dia akinan pa falta di informacion cu gobierno no ta duna. Nan kier placa pura, nan ta haragan pa e placa pero nan no ta duna e oportunidad di pone mas cahero den e luga aki,” el a bisa.
E ta haya cu e situacion aki ta inhumano aki aunke a lo menos ayera nan a pone dos tent adicional, y un jug cu awa, pa soporta e solo sofocante. Segun e cliente aki, si SIA kier nan placa a lo menos mester drecha e servicio, ya cu nos no ta hayando esey. “Nan mester bira consecuente cu e pueblo tambe,” el a bisa.
