Ayera media, Presidente di Parlamento, Ady Thijzen hunto cu e lider di fraccion di MEP, Rocco Tjon a entrega un rapport bou e titulo subhetivo y largo na Hulandes: ‘Aruba terug op de rails van Deugdelijk Bestuur en Deugdelijkheid van Financieel Beheer’, na e representacion di Hulanda na Aruba (VNO). Un rapport cu ambos Parlamentario a traha riba dje.

Despues di sostene e reunion aki cu David Abrahams di VNO, den su declaracion na prensa, Thijzen a bisa cu nan a dicidi di traha e rapport aki, mirando e ambiente cu ta existi previo na e reunion di Conseho di Minister di Reino cu ta tuma luga awe na Hulanda y cu tin riba nan agenda e ley di supervision financiero di Aruba (LAft).

Nan por a scucha cu Hulanda lo bin cu un KB of un ‘aanwijzing’, ya cu e cambionan cu Parlamento a introduci a base di loke nan ta considera como nan autonomia como organo legislativo, y conforme na nos constitucion, no a cay den bon tera cerca Hulanda. Pa Hulanda e cambionan introduci den Parlamento den e ley di LAft ta mengua e trabou di e colegio di supervision financiero (CAft) na Aruba.

Te ainda e ley no a wordo firma pa Gobernador di Aruba, pero –segun Thijzen– den Statuut di Reino no ta defini un tempo pa hacie. Pero si ta poni cu si nan no kier firma un ley, nan mester duna na conocemento di Parlamento pa kico nan no ta hacie. E ta kere cu ya caba a transcuri un tempo prudente, caminda nan a duna tur esunnan envolvi espacio pa haci esaki. Si e ley no a wordo firma, ta importante pa nan duna conoce Parlamento di Aruba dicon nan no a firm’e.

Rapport
Thijzen a laga sa cu pa medio di e rapport aki nan kier mustra ‘hechonan,’ ya cu e documento aki ta contene entre otro, conseho di Raad van Advies (RdA), tambe rapport di Contraloria General y te hasta conseho di CAft, instancianan internacional, Banco Central di Aruba. Te hasta nan a bin cu cierto documentonan cu nan a uza den pasado. Den sintesis –segun Thijzen– e rapport aki ta duna un bista con Aruba tabata ta, con e cos a pasa cu nos a cay den problema financiero, y con pais Aruba ta bezig pa soluciona e problema di finansa publico.

E ta haya oportuno pa bin cu e rapport menciona, ya cu Hulanda tin un posicion pa bin cu e posibilidad di un KB of un ‘aanwijzing.’ P’esey nan kier pone bon cla cu Aruba ta un pais autonomo den Reino Hulandes, e ta un estado di derecho. “Un estado di derecho cu bo tin cu duna respet na Parlamento, na Gobierno y na tur instancia cual sea cu ta,” el a bisa.

El a declara energicamente cu Parlamento di Aruba no ta un departamento di Gobierno cu bo ‘deal cune manera bo kier’. P’esey e pueblo ta scoge su representantenan. Pero esaki no kiermen cu como Parlamento nan ta bay traha manera hende iresponsabel. Tampoco nan mester bira un ‘stempel parlament.’ Igualmente nan no ta haya cu debi cu gobierno a firma protocol cu Hulanda, cu a base di e protocol aki parlamento mester bay di acuerdo cune. E ta haya importante pa nan scucha Parlamento di Aruba, kico nan ta pensa, ya cu nan ta esunnan cu mester duna cuenta na pueblo.

Den caso cu Conseho di Minister di Reino no kier cambia di posicion y nan kier bin cu un KB of un ‘aanwijzing’, nan tin cu argumenta prome. Sinembargo, Thijzen ta expresa cu nan ta keda hopi positivo cu Aruba por sali afo cu e situacion aki. Nan por tin diferencia di opinion, pero e ta kere cu poco poco nan ta yegando na e solucion.

P’esey nan ta kere cu e bishita na VNO tabata uno positivo, ya cu na Corsou tambe tabata hopi bon, y ‘nos ta sigur cu nos ta sigui cana e caminda’. El a culmina bisando cu si tin cierto obstaculo, nan ta deal cu nan tambe.