Personanan desconoci a asesina Jeovanny Alirio Oliveros cu balanan den su cas, un consejal di partido Alianza Verde na districto Colombiano di Cunday, na departamento di Tolima, autoridadnan a informa ayera diaranson. Oliveros tabata un di e legislado municipal cu mas voto den eleccionnan local cu a tuma luga dia 27 di october ultimo na Colombia.
E senador Angelica Lozano, un di e dirigentenan di Alianza Verde, a exigi ‘claridad y husticia’ den caso aki, na mes momento cu a lamenta cu ‘ta sigui asesina lidernan politico y social’ na Colombia.
“Pa e asesinato di nos consejal di partido Verde Jeovanny Alirio Oliveros Mayorga di Cunday, Tolima, nos ta expresa nos condolencia na su famia y comunidad”, Lozano a bisa.
E gobernador di Tolima, Ricardo Orozco a señala cu e crimen a sucede na momento cu ‘varios suheto cu a drenta den su cas pa horta a atenta contra su integridad’.
“E hecho aki ta causa nos dolor y di biaha nos a comunica cu e forsa publico pa adelanta accionnan urgente”, e funcionario a agrega riba su rednan social.
Na e yamado aki a uni e direccion departamental di Tolima di Alianza Verde, cu a pidi pa autoridadnan realisa ‘di manera urgente e accionnan necesario pa haya e responsabel di e hecho lamentabel aki’.
Segun Mision di Observacion Electoral (MOE) 18 lider social of politico y un dirigente comunal a ser asesina na januari y na regionnan mas afecta cu ta e departamentonan di Choco y Cauca, na costa di Pacifico.
Na prome luna di aña, e observatorio di e organismo a conta 55 hecho di violencia politico na henter e pais, 35 di nan contra lidernan social.
