Luna di december di aña pasa tabata uno tristo pa un famia Arubiano cu a perde un di nan ser keri, Sergio Maduro a ser haya morto banda di caminda dia 24 di december na Matividiri, pa esaki, abogado di un di e personanan acusa pa e caso aki a duna un declaracion pa Bon Dia Aruba.
Mediante un comunicado di prensa di Cuerpo Policial di Aruba di dia 24 di december, temporada unda hendenan ta celebra Pasco, a bira conoci e tristo noticia cu tabatin un hende homber benta abao band’i caminda e cual no tabata duna señal di bida. Ora ambulance a yega na e luga no por a haci nada mas pa e persona aki cu no tabatin identificacion cune na e momento di e suceso.
Un dia despues, Polis a informa cu un homber di 44 aña cu e nomber di Sergio Maduro tabata e victima mortal di e caso aki cu tabata bao investigacion na e momento ey.
Pa dia 14 di februari, autoridadnan a duna di conoce cu a logra detene dos sospechoso, un hende homber di nomber Bryan Jimenez naci na Aruba di 37 aña di edad y un hende muhe di 39 aña di nomber Jennifer Gonzalez naci na Aruba tambe, ken tabata pareha di Maduro.
Diabierna ultimo, a tuma luga e tratamento di e caso aki na Corte di Prome Instancia na unda e dos sospechoso tabata dilanti hues y awor mester warda pa e sentencia, pa esaki, Bon Dia Aruba a haya declaracion di Desiree Croes, ken ta abogado di Jennifer Gonzalez y el a señala cu su cliente, ta un persona special cu un Intelligence Quotient (IQ) di entre 50 cu 70, e promedio ta di 62 segun e cantidad di test cu a haci cune.
62 ta igual na un edad di referencia di un mucha di 6 aña y 7 luna, segun e psicologonan ta indica.
Croes a pidi un vrijspraak y un Ontslang van alle Rechtsvervolging (Ovar) di e cual el a splica cu aunke si e persona ta wordo declara culpabel, e no por haya castigo pa motibo cu no ta responsabel pa su actonan. “E inteligencia di Jennifer den e caso aki ta asina abou cu e no por wordo considera como un persona normal,” Croes a bisa.
El a splica cu den e prome parti na unda el a pidi vrijspraak ta cu den ni un caminda por a sali afo cu Jennifer a comete e delito di e cual ta acusa di mata Maduro, pa motibo cu tin otro persona cu a haci’e, e cual ta Bryan, segun loke Croes ta señala.
“Bryan a admiti cu e mes a hacie y e so a hacie, su historia ta cu el a wordo pidi y paga pa haci e asesinato, pero Jennifer semper ta sigura cu no, cu e no a pidie pa haci e asesinato y tampoco a page nada.”
Pa esaki, fiscal di Ministerio Publico ken a pidi 20 aña di castigo pa Jennifer, a argumenta cu si, cu Jennifer a paga Bryan 150 florin, e cual Jennifer ta sigura cu mester a duna e placa ey debi na dañonan cu su cacho a haci na un sofa di e cas di Bryan, ademas e cachonan tabata keda cerca dje y esey tabata pa cumpra cuminda tambe, manera e abogado ta señala.
Tambe, fiscal a argumenta cu Jennifer kier a paga 2.000 florin segun loke Bryan a sigura. Croes a bisa cu nan defensa tabata hopi zwak.
Tambe tin e testimonio di e persona cu a hiba e 150 florin pa Bryan, e cual a conta e mesun declaracion di Jennifer.
Bryan ta sigura cu Jennifer a pag’e pa mata Maduro “pero pa bo por pidi un hende y plania un asesinato ta cu mester di un cierto nivel di inteligencia pa bo por plania, wak e posibilidadnan y purba pensa pa comete un asesinato. Esey ta practicamente imposibel pa un hende di e nivel di inteligencia di mi cliente y esey ta loke mi a splica nan tambe, cu bo tin dilanti un persona cu tin un IQ di un mucha di eerste klas, e ta mescos bo ta pidi un mucha chikito bay planea un asesinato, e no ta bay,” Croes ta señala.
Ademas, Bryan cu a admiti cu el a comete e asesinato a bisa cu e ta sufri tambe di trastorno di personalidad, cu e ta sufri di bipolaridad unda e tabata bisa cu e tin mas cu un personalidad y den combersacionnan cu a tap di dje cu un amigo, el a bisa cu el a mata 15 hende caba, cu e ta un serial killer “cu bo mester ta rondiando tur e morto den un buraco na Parke Nacional Arikok, pasobra el a bisa esey tambe.”
“Eynan bo ta wak cu su cabes no ta bon y cu e ta biba den un mundo di fantasia, mi defensa tabata cu e meneer akinan, Bryan a hacie riba su mes den su realidad, den su pensamento mi cliente lo a mand’e haciel’e pero ni un caminda bo no por prueba cu mi cliente a mand’e haci’e,” e ta bisa.
Den tur tapgesprek cu tabatin entre Jennifer y Bryan, “ni un caminda mi cliente ta bisa ‘hey danki pa hacie’ of ‘b’a haci un trabou’, esey nan no tabata t’ey,. e ta un realidad cu ta existi den e cabes di e mucha homber aki” Croes ta sigura.
Na e momentonan aki, nan ta wardando pa decision di hues cu lo tarda un tempo di tres siman y Croes ta sigura cu e ta spera cu hues tambe lo por wak di e mesun forma, cu Jennifer ta un persona simpel di mente, cu no por a plania e asesinato di Maduro, cu no por a calcula y den hopi cos cu ta bis’e, e no ta reacciona normal.
Den su opinion, Jennifer no tabatin inteligencia pa plania e asesinato di Maduro y tampoco pa tapa y no papia di cierto cosnan, tur esey no por a wordo prueba.
