(Newsweek) – Discriminacion y stigma social por tin un impacto significativo den salud mental di e poblacion LGBTQ+, na Mexico un di cada tres hoben a purba mata su mes durante aña 2023, 77% a expresa cu tabata pa motibo di un situacion familiar y 60% pa via di e ambiente na scol.
Di acuerdo cu e prome encuesta riba “Salud Mental di Hubentud LGBTQ+,” publica pa The Trevor Project Mexico, 57% di hoben entre 13 y 17 aña a considera mata su mes aña pasa, 46% di nan ta entre 18 y 24 aña.
E personanan aki ta enfrenta factornan di stress unico como e falta di apoyo of aceptacion familiar y di amigonan, asina como menasanan of exposicion na terapia di conversion (cu intencion di cambia orientacion sexual of identidad di genero di un individuo mediante presunto autoridadnan religioso of profesional).
“A tuma nos un aña pa haci e encuesta aki; nos a publica e resultadonan dia 20 di februari y tin hallazgonan basta fuerte. A wordo realisa door di otro dos organisacion: Yaaj y Asociacion pa Infancia Transgenero. Ademas, un investigado di Universidad Nacional Autonomo di Mexico a yuda nos.”
“Trevor ta bin di Merca, ta un organisacion cu tin 25 aña na e pais aki, y tin un area di investigacion. Pero un comite di revision institucional, independiente na esun Mericano, ta esun cu a yuda nos aproba e contenido y metodologia,” Edurne Balmori Palacios, director ehecutivo di The Trevor Project Mexico a bisa.
Hende homber trans segun e encuesta, a reporta e tasa mas halto di consideracion pa nan mata su mes, intento di suicidio (52%) compara cu otro diferente identidad di genero.
Na Mexico, 37% di e poblacion mayor di 18 aña a reporta discriminacion den ultimo aña y un di e datonan mas importante pa destaca ta e tema di salud mental, p’esey e tema di un crisis of di un idea suicida no ta liga na e persona mes, ni na orientacion sexual of identidad di genero, pero si na entorno na unda nan ta biba.
Despues cu a purba di mata su mes, 58% di nan a afirma cu ni un hende a haya sa, kiermen nan no a conta kico a pasa.
Otro dos elemento importante ta depresion y ansiedad, segun e estudio aki, 53% di hubentud LGBTQ+ a registra sintomanan di ansiedad, incluyendo 60% di hobennan trans y no binario. Ademas 58% a reporta sintomanan di depresion y mas di e mita di e personanan consulta a afirma di sinti nan mes su so frecuentemente.
Pa loke ta trata terapia di conversion, un di cada cinco hoben a manifesta di a haya menasa pa bay na esaki (12%) of nan a wordo someti na dje (9%).
Finalmente, papiando di rednan social, hubentud LGBTQ+ a identifica Facebook como e plataforma cu e discurso mas discriminatorio of di odio mas grandi cu 64%, den di dos luga “X” cu 21% y Tik Tok cu 12%.
The Trevor Project ta un organisacion cu ta traha den intervencion di crisis y prevencion di suicidio pa poblacion LGBTQ+ (Lesbian, gay, bisexual, trans, queer y mas), di acuerdo cu Edurne Balmori Palacios nan ta conta cu personal capacita pa atende e hubentud ora ta enfrenta na temanan di identidad di genero, depresion of ideanan suicida.
