Un confrontacion cu Hulanda ta birando inevitabel: Ora no tin respet ta keda na Parlamentonan pa exigi respet usando tur arma legal

Reunion di IPKO a termina siman pasa diahuebs caminda despues di cuater dia cu miembronan di Parlamento di e paisnan di Reino Hulandes a reuni na Bonaire, no ta mucho cla kico a wordo logra concretamente.

AVP tin e impresion for di informacionnan acumula, cu manera tur otro reunion anterior, e resultado di e discusionnan riba e nivel halto aki, tur hende ta carga e speransa cu a yega na palabracionnan concreto y cu e paisnan ta yedando na otro.

Sinembargo e reunion di siman pasa simplemente a bolbe mustra cu e paisnan di Caribe Hulandes, ainda no sa unda nan ta para, ya cu gobierno Hulandes practicamente a pone placa riba cabes di tur e gobiernonan aki, menasando di stop ayudo financiero si no acepta nan condicionnan, y practicamente abusando di e paisnan den necesidad aki.

Fuera di esey no ta placa cu Hulanda ta duna e islanan aki pero ta prestamo cu tanto Aruba como e otro islanan tin cu paga bek pero pa haya e placa tin cu acepta cosnan cu realmente ta violando Constitucion y Statuut di Reino Hulandes pero no por mira un indicacion cu ta bay inicia un proceso contra di e abuso aki.

Durante di e reunion di siman pasa por a scucha cu varios fraccionnan den e reunion di e islanan den Caribe, a vocifera nan obhecionnan pa e maneho cu Hulanda a bin ta hibando cu lo hinca e islanan mas den problema financiero y lo afecta e interes general di e paisnan aki.

Yegada di COHO simplemente ta mishi cu e poder di Parlamentonan y aki ta caminda ainda no tin mucho claridad kico por wordo haci pa trece cambio den e instalacion di e instituto Hulandes aki.

En berdad ta papia cu e islanan den Caribe lo tin un representante den COHO pero en realidad ta Hulanda ta esun cu tin e decision final, ta esun cu ta determina kico por y kico no por y no ta prome bes cu esaki lo sosode.

Analisando e reunion den su totalidad, tin cu constata cu e momento ta yegando pa e islanan di Caribe Hulandes, bay den un confrontacion directo cu Hulanda, busca tur posibilidad legal y constitucional pa lucha contra di e abuso aki.

Studia cual instancianan internacional y mundial por consulta pa hiba Hulanda dilanti di esakinan pa asina busca un forma pa caba cu e abuso aki, caminda cu paisnan den necesidad ta wordo manipula di e forma cu Hulanda ta haciendo, esaki cu fondonan di ayudo na e paisnan aki.

Parlamento di Aruba tin cu transforma su mes, nan tin cu realisa cu mientras nan ta sostene e proximo gobierno di coalicion, e poder di control, e poder legal ta keda den e institucion aki cu por haci mucho mas di loke ta wordo haci na e momentonan aki, segun partido AVP.

IPKO a bolbe demostra cu Parlamento di Aruba tin cu busca su propio rumbo, crea su propio caracter y propio identidad, algo cu el a perde den ultimo añanan pero ta solamente ora cu e miembronan di Parlamento realisa e poder cu nan tin y con esaki tin cu wordo usa pa defende e pueblo cu nan ta representa, e ora por papia di un Parlamento otro y diferente.

Na e momentonan aki ta mesun parlamentarionan cu ta sinta cu gobierno den e fase di preparacion di programa di gobernacion, den futuro tin cu controla mesun programa aki.