Un Colombiano parti di e tripulacion di e crucero Diamond Princess, cu ta den cuarentena na e costa di Hapon, a bira e prome ciudadano di e pais Andino contagia pa coronavirus, e canciyeria di Colombia a informa ayera na Bogota.
“E dia di awe a keda conoci di parti di embahada cu e prueba di coronavirus (COVID_19) cu a ser realisa pa e barco a resulta positivo y cu e persona tin cu sali for di barco como medida di precaucion, loke ta adapta pa e protocol medico local”, Ministerio di Relacionnan Exterior a bisa den un comunicado.
E informacion ta agrega cu ‘te na e momento, no tin registro di otro ciudadano Colombiano na Hapon cu situacion relaciona na coronavirus (COVID-19)’.
Canciyeria a sigura cu ‘embahada di Colombia na Hapon lo continua efectua tur e labor di asistencia y apoyo cu mester pa e Colombiano aki, y pa e comunidad’ residente na e pais.
Tambe a aclaria cu ‘den aplicacion di normanan di proteccion di dato personal, no ta duna di conoce e nomber di e persona infecta, solamente si e persona mes ta duna autorisacion’.
Autoridadnan di Hapon a informa cu e casonan di coronavirus den crucero ta 355 y cu te na e momentonan aki a realisa test pa 1.219 persona di 3.700 cu tabata abordo ora e autoridadnan a decreta e cuarentena dia 3 di februari ultimo.
Desde e momento ey, autoridadnan a permiti e salida for di e barco di pasaheronan cu no a haya COVID-19, ademas di autorisa esunnan di edad mas avansa of cu otro complicacion di salud cu a duna negativo pa cu analisis medico pa desembarca for di e barco.
