(AP) – Un di e misterionan di e industria di criptomoneda a tuma centro di escenario diamars na corte di London unda un huicio finalmente lo por soluciona e debate di e identidad di e fundador di Bitcoin.
Cientifico di computer Australiano Craig Wright a subi como testigo na Corte Halto y a testigua cu e ta e persona cu ta tras di “Satoshi Nakamoto,” e nomber cu ta sconde e identidad di e creador di bitcoin.
Wright tin hopi tempo ta bisa cu e ta Nakamoto. Un grupo di tecnologia y companianan di criptomoneda ta purbando di comproba cu e no ta. E huicio a cuminsa dialuna y e ta premira di dura un luna prome cu hues dicta sentencia. “Wright su declaracion cu e ta Satoshi ta un mentira, basa riba un narativa falso cu ta sosteni pa falsificacion di documentonan riba un escala industrial,” abogado Jonathan Hough a bisa di parti di Crypto Open Patent Alliance (COPA) pafo di e huicio. “Mirando cu su documentonan y falta di consistencianan a ser exponi, el a cuminsa cu mas falsificacion y mas excusa.”
Den riesgo tin no solamente e derechonan di e creacion sino tambe control riba e derechonan di propiedad intelectual.
Wright a usa e declaracion como inventor di Bitcoin pa pidi litigacion pa por preveni cu desaroyadornan por sigui desaroya e tecnologia di fuente habri, e aliansa a declara den nan demanda. E declaracion lo afecta 3 demanda pendiente cu Wright a otorga basa riba su declaracion tocante tin e derechonan di e propiedad intelectual. “Wright a menasa pa causa cu e desaroyadornan lo keda bancarota, a manda notificacion di su intencion di deanda y a cuminsa cu litigacion contra 3 di e boluntarionan, tur basa riba e declaracion cu e ta e fundador di Bitcoin.”
E origen di Bitcoin ta bay atras te na e punto mas halto di e crisis financiero na aña 2008. Un papel skirbi pa un persona of grupo usando e nomber Nakamoto a splica con moneda digital por ser manda rond mundo di manera anonimo, sin banconan ni monedanan nacional. Nakamoto aparentemente a disparce 3 aña despues.
Speculacion tocante e identidad di Nakamoto a core rond pa añanan y e nomber di varios candidato a surgi ora cu Wright a bini dilanti bisando cu e ta Nakamoto den aña 2016 y a disparce rapidamente despues di esaki, bisando cu e no tabatin e “curashi” pa provee mas prueba. El a sigura den corte diamars cu el a crea e tecnologia y e identidad criptico tras di esaki, cual el a bisa ta basa riba su admiracion pa cultura Hapones. El a bisa cu e nomber tabata un combinacion di e fam di filosofo Tominaga Nakamoto y Satoshi David, un figura den un buki skirbi pa J.P Morgan y un caracter di Pokemon. Segun e ta conta e no tabata kier pa e creador ta anonimo, pero el a usa un alias pa proteha su privacidad. “Esaki a permiti mi por enfoca riba mi trabao y a sigura cu e enfoke lo keda riba e innovacion y potencial di bitcoin na luga di e individuo tras di esaki,” el a declara.
