![Britain Bitcoin Founder](https://www.bondia.com/wp-content/uploads/2024/07/Un-cientifico-di-computer-di-Australia-cu-a-declara-cu-el-a-inventa-bitcoin_result-696x468.jpg)
(AP) – Un cientifico di computer Australiano cu aparentemente a falsamente declara cu e ta e creador misterioso di e criptomoneda bitcoin, lo ser hiba dilanti fiscalnan Britanico pa “falsificacion di documento y perhurio,” un hues di London a bisa diamars.
Hues James Mellor, ken a declara despues di un marcha di huicio civil den maart cu Craig Wright no ta e persona tras “Satoshi Nakamoto,” e nomber cu a enmascara e creador di Bitcoin su identidad, a bisa cu e lo referi e caso na Crown Prosecution Service pa considera si lo trece acusacionnan criminal den su contra.
“Pa medio di avansa su declaracion falso di ta Satoshi via varios accion legal, Dr. Wright a comete ‘un abuso hopi serio’ contra e poceso di corte di Reino Uni, Noruega y Merca,” Mellor a comenta. “Si loke a sosode den e caso aki no ta digno di referi e caso na CPS, eora e ta dificul pa envisiona ki caso si.”
Mellor a declara na un huicio cu Wright no a inventa bitcoin, e no tabata e persona tras di Nakamoto ni tampoco e creador di e programacion di bitcoin.
E origen dudoso di bitcoin ta bay te cu e punto mas halto di e crisis financiero den 2008, ora cu e persona of e grupo usando e nomber di Nakamoto a otorga un documento splicando con e moneda digital por ser manda alrededor di mundo anonimamente, sin banconan ni monedanan nacional.
Speculacion riba e identidad di Nakamoto a circula pa añanan largo y varios candidato a surgi ora cu Wright a bini dilanti pa tuma e identidad den 2016, solamente pa rapidamente bolbe sombra back, bisando cu e “no tin e curashi” pa provee mas prueba.
Den loke a ser considera un victoria grandi pa desaroyadornan di Open Source, un grupo sin fin di lucro pa tecnologia y companianan di criptomoneda a exitosamente demanda Corte Halto pa comprobe cu Wright no ta Nakamoto.
Crypto Open Patent Alliance (COPA) a argumenta cu Wright a comete “falsificacion riba un escala industrial” pa sostene un “mentira grandi” cu e tabata Nakamoto. E aliansa a bisa cu el a usa e declaracion como bitcoin su inventor pa “terorisa” e desaroyadornan pa medio di entrega un litigacion pa preveni cu nan por sigui desaroya tecnologia open-source.
Wright, ken a testiga durante varios dia den e huicio cu a dura 3 siman, a nenga e acusacionnan. Den mei, el a bisa cu e plataforma di rednan social riba X cu e tin plan di apela contra e decision “riba e topico di su identidad.”
E huicio tabatin implicacion pa control di e derechonan na propiedad intelectual di e criptomoneda mas popular den mundo. E declaracion a afecta 3 demanda pendiente cu Wright a entrega basa riba su declaracion pa tin e derechonan di propiedad intelectual di bitcoin.
Mellor a otorga dos blokeo riba diamars cu ta preveni cu Wright por demanda of menasa cu esaki contra e desaroyadornan.