Un auto a dal 13 studiante cu tabata protesta dilanti un scol na Ciudad di Guatemala, pa un supuesto problema educativo. Entre hende cu a resulta herida tin un hoben cu a perde su pia y cu awor ta den cuido intensivo, den estado hopi grave.
Otro 11 studiante tin herida menos grave y nan a ser traslada pa hospital Roosevelt; seis di nan a sali diaranson for di hospital caba y otro cinco ta den situacion stabiel pero ainda na hospital.
Amilcar Montejo, vocero di polis di Guatemala a bisa na periodista cu e suceso a tuma lugar na zona 7 di capital di Guatemala, caminda un auto a dal contra studiantenan riba caminda di San Juan. E conductor di e auto a huy despues cu el a dal e studiantenan. E grupo di studiante a cera transito di auto riba e caminda y varios chauffeur cu tabata hopi rabia tabata purba di haya algun otro ruta alternativo, ora cu polis tabata yega na e lugar. E grupo di studiante ta di e scol nacional di ciencia comercial, kendenan tabata bisa cu nan no ta bay move di e lugar ey, te algun representante di ministerio di educacion bin cerca nan y scucha nan solicitudnan.
E grupo di maestro no sa e motibo di protesta. Segun e grupo di hoben, nan tabata pidi pa autoridad por nombra un otro director pa e centro aki.
PNC a informa cu algun ora despues di e suceso, nan a haya e auto cu a dal e studiantenan. E auto ta di color shinishi, segun por mira den imagennan di seguridad riba internet. E chauffeur no a ser identifica ainda.
