Un caso recupera di coronavirus, 4 positivo y 127 den cuarentena

Despues cu a keda conoci cu un pashent cu tabata positivo pa coronavirus a recupera satisfactoriamente, awor e cantidad di pashent positivo cu e virus aki a bira cuater na Aruba.

Ayera mainta, PR di departamento di Salubridad Publico (DVG), Jurette Croes a duna un actualisacion riba e casonan di coronavirus. Ademas di e cuater caso isola cu a test positivo pa e virus aki, el a informa cu tabatin 61 caso cu a test negativo. Ademas a test 70 persona, y actualmente tin 127 persona den cuarentena.

Igualmente el a laga sa cu e conferencia di prensa caminda nan ta duna update relaciona cu e coronavirus, nan a dicidi di hal’e for di orario di mainta pa 2or di atardi. E motibo tras di e decision aki tin di haci pa duna un miho informacion na comunidad pa loke ta update, y e cambionan cu ta tuma luga durante dia.

Den caso cu tin preguntanan cu e no por contesta den nomber di DVG, nan lo wordo anota y minister presidente mes lo contesta na nan, durante su rueda di prensa diario di 8or di anochi. Nan website ta: www.arubacovid19.org, caminda tur persona interesa por haya update di Gobierno di Aruba y nan decisionnan pa atende cu e tema di coronavirus riba nos isla. Tambe tin informacion importante di DVG riba con pa preveni e virus aki.

El a reitera cu mirando e cantidad di persona cu ta den cuarentena e momento aki ta di gran importancia pa e personanan cu ta bao cuarentena mantene nan mes na instruccionnan cu nan ta haya di DVG. Riba pagina 32 di edicion aki, Bon Dia Aruba ta publica otro articulo riba isolacion y cuarentena a base di informacion duna pa DVG. Di e forma aki nos tur evita cu e malesa Covid-19 por sigui plama den nos pais. E conseho principal ta pa keda cas y aplica distancia social.

E persona cu mester sali pafo ta importa pa e aplica e medidanan di higiena, specialmente laba man frecuentemente. Pero tambe evita di touch cu bo wowo, nanishi y boca, ya cu esaki ta e manera cu e virus ta drenta den nos sistema. Ademas esun cu ta malo keda na cas y absolutamente no sali pafo.

Croes a informa comunidad cu e call center number 280-0101, aworaki ta destina exclusivamente pa persona cu tin sintomanan di tosamento, dolor di garganta y dificultad pa hala rosea. Specialmente pa esunnan cu a bin di biahe for di un pais, unda cu tin Covid-19 of si nan tabatin contacto directo cu un persona cu ta positivo pa e virus.