Jennifer Laclé-Boezem ta un autor nobo cu a skirbi un buki cu ta rescata mas cu 35 aña di historia di e Festival Voz-i-Landia Escolar. Den cuadro di celebracion di Dia Mundial di Buki y Derecho di Autor, Bon Dia Aruba ta destaca e obra aki, cu a wordo presenta na luna di november ultimo.

Jennifer ta maestra di scol, docente di Papiamento y docente di prome grado di Spaño, kende a traha varios aña na scol basico, na MAVO, y despues di su estudio di Papiamento y di Spaño, el a duna les na scol secundario HAVO/VWO den Colegio Arubano, Oranjestad.

Pero tambe e tabata docente di musica, kende a descubri den dje un instrumento di formacion pa un generacion nobo di muchanan cu a participa den e festival aki. Despues di cuater aña, e festival aki lo wordo realisa un biaha mas e aña aki.

Festival Voz-i-Landia
Voz-i-Landia ta un festival di canto pa muchanan di scol. Na 1981 ya caba tabatin festival pa mucha na Aruba. Pero nan a bin cu un idea nobo pa introduci esaki na nivel di scol, pa duna di conoce talentonan infantil. Cantidad di muchanan a yega di participa durante e casi 40 aña di e festival aki. Nan tabata muchanan di scol basico di 7 pa 13 aña. Tabatin aña cu e festival no a wordo realisa pa diferente factor. Un factor cu a afecta e realisacion di e festival tabata ora cu Lago a cera, cu a trece su crisis cune.

Jennifer ta reflexiona mas riba locual e festival aki a nifica pa e muchanan cu a pasa den dje. “Pa nan, nan tabata artistanan grandi,” el a bisa. Aworaki cu nan ta grandi, nan por a realisa ki oportunidad nan a haya di por demostra nan talento, y tin algun di nan cu a sigui den dje. For di e festival aki a nace artistanan manera Edjean Semeleer, Gloria Vega, Cesar Olarte, etc.

E tabata un festival participativo y incluso. E scol mes tabata scoge e mucha, pues no tabatin preferencia. Tambe un regla tabata cu tur areglo y cantica tabata wordo paga pa e organisacion di e festival. Tambe nan tabata percura pa tur gasto, hasta si e mucha no tabatin recurso economico pa cumpra paña.”Si e mucha tin talento, e no tin mag di wordo exclui,” el a bisa.

Papiamento a canta
Inicialmente e tabata di bira djis un festival di bos, pa e muchanan canta cualkier cancion. Asina nan a cuminsa cu e prome festival, cu tabatin temanan musical den diferente idioma. Pero unabes cu e festival a haci su introduccion y di biaha a bira un exito, e organisadonan a dicidi di bin cu otro idea pa e di dos version di e evento aki. Esta cu e festival aki por bira un escenario caminda e muchanan por adkiri canticanan original, nunca antes presenta, y den nos idioma materno Papiamento.

Un cantica cu awendia a bira un joya musical clasico den nos idioma crioyo tabata Cunucu di Seit, di Sr. Ramon Krozendijk, cu a wordo presenta durante e prome aña cu nan a haci e festival na Papiamento. E biaha ey, e tema aki a wordo canta pa Ferdinand Carrion, cu un stem masha bunita mes. Pues e festival aki tambe a bira un reto pa nos compositornan, entre nan, Etty Toppenberg, Maybeline Arends, Rufo Odor, etc. Pero tambe pa e areglistanan manera Ivan Jansen, Roberto Montiel, Franklin Gradadillo, Lucio Rivadeneira, Eddy Bennett, etc.

Fundeshi
El a conta nos cu su inspiracion grandi tabata e festival di OTI cu tabatin na Aruba pa hende grandi. Algo cu e tabata gusta di e festival aki tabata nan tema musical. Ora cu nan a bin cu e idea pa realisa e festival pa mucha, el a bay cerca Joy, kende tabata e autor di e tema di e festival di OTI, pa pidi su autorisacion pa uz’e den e Festival Voz-i-Landia. Na e momento ey, Jennifer a haya un no rotundo como contesta. Sinembargo, Joy a laga un curiosidad cerca dje. Joy a bis’e: “Bin otro mañan, anto mi ta wak kico mi por haci pa bo.”

Dos dia despues, Joy mes a tuma contacto cu Jennifer, ya cu el a traha un cantica specialmente cu ta yama Voz-i-Landia, cu a bira e tema musical di e festival aki. Un tema contagioso y nostalgico, cu te cu awendia e muchanan di e tempo aya, ta tende y nan ta sinti un emocion grandi. “Danki na Joy Kock!,” el a bisa. Tur esaki ta parti di e fundeshi di e festival, cu a nace na 1981, y cu a yuda engrandece e evento anual aki. Tambe e logo, cu ta un obra di e docente Fred Meenhorst, ta traha specificamente pa e festival. E logo aki a contribui pa duna su identidad y cello di exito.

Tur e informacion aki y mucho mas ta e contenido di Jennifer su buki Voz-i-Landia Escolar: E poder d creatividad musical, di 160 pagina imprimi den un bunita edicion. Un buki cu el a hinca hopi sacrificio personal y esfuerso financiero pa e memoria di e festival y tur esunnan envolvi den dje, no bay den olvido: historia, participantenan, musico, compositornan, areglistanan, etc. Cada un di nan a haya e balor cu nan merece pa nan esfuerso y dedicacion. E buki aki ta obtenibel via cel 740-2044 of 742-6274.

Pero tambe e buki aki ta laga atras un reflexion. Un festival di e caliber aki, e muchanan mester keda central. E ta lamenta e dineral cu awendia ta wordo cobra pa areglo musical, y loke e compositor ta cobra pa su cantica, y e musico cu ta cobra pa su trabou, lo yega e dia cu lo bira imposibel pa sigui organisa un festival asina. “E organisado ta duna pa otro gana. E trabou di e organisado ta e pasion cu e ta traha cune,” el a expresa.

Awendia palabra di gradicimento so Jennifer tin pa tur hende cu a participa directo y indirectamente pa engrandece e festival aki pa mas cu tres decada.