Ta bira tempo pa pone orden den transporte maritimo
Den e dianan cu a pasa, nos por a haya sa varios asunto cu tabata cushina di basta tempo caba. Asina nos por comprende cu, despues cu felizmente e aventura riba lama grandi, di nuebe persona a bin caba na un manera positivo, cu e boto en cuestion no tabatin ni autorisacion pa transporta hende fuera di awa teritorial. E boto no tabata dispone di e material di comunicacion necesario pa haci un biahe asina, pero por constata cu nan a haci esey y no pa prome biaha. Tampoco nos no ta tende ningun comentario con ta bay preveni un incidente asina, cu e mesun boto aki y cu tur e otronan. Nos por conclui cu desde awe ta ‘business as usual’ na Barcadera, of por ta cu tin algo a cambia den maneho di e asuntonan aki?
Di e kehonan di personal di Aduana na Barcadera recientemente nos por saca afo cu tin un crecemento grandi di transporte di persona ta tumando luga, sin cu e autoridadnan por (y talbes kier) responde cu e contundencia cu e caso ta exigi.
No mucho tempo pasa den e seccion aki nos a haci e pregunta si Aruba realmente ta prepara pa e posibel yegada na gran escala di persona for di Venezuela, no como turista sino como refugiado, mirando e situacion politico y economico cu ta pintando aya, y cu por cierto caba ta hopi cerca, cu e eleccion na Venezuela di e fin di siman aki. E prologo di esaki ta loke nos ta sintiendo caba na haf di Barcadera cu yegada di gran cantidad di persona via lama, sin cu tin un contesta adecua di e autoridadnan cu mester percura pa e cuerponan uniforma tin e capacidad necesario pa atende e situacion aki.
Ta masha bunita cu Prome Ministro Eman atrobe ta gana punto di popularidad, argumentando cu el a laga trabao importante para na Paris pa atende e asunto di e naufragonan. Ta masha bunita pa ‘mustra e banda humano aki’ pero di otro banda e ta e lider gubernamental cu ta responsabel pa e maneho deficiente aki cu ta permiti doño di boto ta subi lama sin un preparacion debido y ta envolvi den transporte di persona pa teritorio stranhero sin ta debidamente autorisa y controla. Ta di spera cu ora caba di atende e asunto aki, por corda tambe drecha loke no ta bon den forma structural den e asunto aki. Nos no a tende niun hende ta papia di esey.
Ademas henter e incidente aki a costa nos balente placa den e operacion di tanto instancia den e buskeda y pago di pasashi pa nan por regresa Aruba. E pregunta ta masha simpel: nos ta reserva placa pa cada biaha absorba e gastonan di operacion di rescate, of nos ta cuminsa pone recurso disponibel pa nos autoridadnan por actua na tempo pa preveni cu un boto ta biaha pa otro pais, totalmente sin e medionan adecuado pa combati e consecuencianan di mal funcionamento di e embarcacion. Tur e buskeda, tur e angustia, tur e recursonan gasta na boto y avion pa busca nan, no tabata necesario si a percura pa e doño di e boto tabatin ekipo di comunicacion y GPS pa detecta nan posicion.
Tambe ta resulta cu aki tambe nos ta topa cu un caso di ley anticua di casi 100 aña bieu (Vaartuigverordening) mientras e version nobo aparentemente ta benta na Departamento di Legislacion pa basta tempo caba y no tin un bista ainda ki tempo esaki por yega Parlamento. Con tal cu e autoridadnan concerni no por actua na un manera debido; e storia di semper.
Pa nos por papia di bon gobernacion den percura pa nos tin bon ley cu bon ehecucion di e reglanan, nos mester tene cuenta cu varios aspecto. Na prome luga mester formula ley solamente ora cu esaki ta estrictamente necesario. Tur cos cu por resolve cu otro instrumento di administracion y maneho publico, y cu ta evita cu mester traha ley, ta un beneficio. Pakico? Pasobra traha ley no ta asina caro, pero mantene ley adecuadamente durante tur e añanan despues si ta sali hopi caro. Kico ta e instrumentonan aki? Informacion pa stimula actitud y comportacion di e ciudadano; oferta di facilidad y incentivo financiero cu ta stimula e comportacion desea.
Ta solamente despues cu constata cu traha ley pa regula y ordena un cierto asunto ta inevitabel pasobra no ta logra cu e otro instrumentonan, ta pasa pa haci esaki. Pero, si tin ley, mester tin e medionan financiero pa paga personal y ekipo pa haci un trabao corecto, si no, no ta bale la pena ni cuminsa.
Den e asunto aki ta bin na cla atrobe kico ta e consecuencia di gasta placa riba cos cu no ta prioridad, en bes di reserva placa pa nos cuerponan uniforma tin tur cos pa nan por actua corecto y efectivamente. E ora tambe e leynan modernisa cu mester tey lo tin sentido. No por permiti cu gobierno de bes en cuando ta traha riba un aspecto pero no riba e totalidad.
Publica den Bon Dia Aruba 3 december 2015
