Minister di Enseñansa, Rudy Lampe ta di opinion cu e problema di consumo di droga, como e problema di embaraso hubenil, mester wordo atendi pa medio di un bon educacion. Ta e caso di muhe menor di 16 aña cu ta bayendo scol y cu ta sali na estado y e mandatario ta haya cu, un forma pa deal cu e problema aki ta pa medio di educacion sexual.

Minister Lampe a informa cu nan a desaroya materialnan educativo pa atende cu e tipo di problemanan aki cu ta afecta nos comunidad. Nan ta bay continua cu e training di e maestronan pa loke ta, no solamente topiconan di educacion sexual, sino e topico di educacion di droga.

Tambe nos comunidad ta confronta e problema social di abuso di muchanan. E ta haya cu un forma pa deal cu e problema aki ta cuminsa educa na scolnan. P’esey, segun e mandatario, a introduci un serie di les riba con pa preveni abuso di mucha. E ta un forma pa empodera e muchanan con nan tin cu haci den cierto situacionnan pa nan por evita y bisa no. Pero fundamentalmente, preveni cu nan lo por bira victima di abuso. “Kier men ta via educacion, duna les na e scolnan riba e parti ey,” el a bisa.

Adiccion di droga
 E mandatario a agrega cu esaki tambe ta conta pa droga. E ta haya cu ainda falta hopi na nivel di gobierno pa atende cu e problema di adiccion y pa atende cu e añanan di retraso; esaki ta exigi pa bin cu un maneho mucho mas integral pa atende e problema di adiccion den nos comunidad.

Den e caso aki, lo ta educacion di droga caminda mester educa e mucha for di chikito kico ta nifica y ki impacto droga por tin den bo curpa. E ta un forma pa preveni e abuso di droga, pa medio di educa e muchanan for di tempran. Pero, e ta haya cu e adiccion mas grandi den nos comunidad ta esun na gambling, of wega di placa den casino. Dificilmente nan por atende e problema aki door di cera tur casino, ya cu esey no ta un solucion. “Kier men adiccion na droga no ta diferente cu adiccion na gambling,” el a bisa. E ta considera cu esaki tambe ta un problematica di salud publico. Mester bin cu un maneho con pa preveni of atende e problema di adiccion.

Igualmente, Minister Lampe a declara cu, a pesar cu nan ta limita den nan presupuesto pa haci inversion, nan ta haciendo un esfuerso pa nos scolnan por cuminsa cu e trayecto di digitalisacion, ya cu tecnologia nobo ta exigi inversion di placa. E ta spera cu, pa e proximo aña escolar, lo mustra pueblo diferente avance cu tin riba tereno di digitalisacion di enseñansa.

Tambe di parti di e cuerpo di docentenan, nan por mira cu mas y mas docentenan ta wak e necesidad di esaki; ya cu e instrumentonan digital lo por bira un alivio pa nan trabou. Asina aki nan por haya tempo pa nan por dedica na otro aspectonan importante di enseñansa.