Un bista den e bida di un hoben; Cu su momentonan halto y su momentonan baho

Indudablemente, e ta hopi leuk pa ta un hoben. E añanan aki ta mira como e miho añanan di nos bida, y ciertamente esaki ta berdadero pa hobennan femenino.

Esakinan ta e momentonan den bida pa nos desaroya nos mes como persona y descubri ken nos ta. No solamente nos curpa ta crece, pero tambe nos mete y nos personalidad, hunto cu nos gusto y perspectiva di mundo.

Como un hoben cu ta bay scol, mi dianan ta practicamente mescos. Mi ta lanta 6:30 di mainta y mi ta prepara pa yega scol prome cu 7:45. Un di e momentonan cu mas mi gusta di tur dia, ta e momento cu mi por disfruta cu mi amistadnan prome cu scol cuminsa. Nos ta topa na nos spot unda nos ta sinta tur dia, y nos ta conta otro tur loke nos a haci e dia anterior, y kico tur nos lo haci e dia ey. Pa e siguiente oranan, mi enfoke principal ta yega na final di dia pa mi por bay cas wak mi cachonan y mi programanan di television.

Pa mi persona, esaki ta un di e miho partinan di ta un hoben. Nos tin responsabilidadnan cu ta relativamente simpel, y aunke scol por ta dificil y abrumante, algun di nos tin e suerte di tin amistadnan rond di nos cu ta haci e proceso mas facil. Tambe nos ta den e edad unda cu e ta mas facil y accesibel pa sali y explora ken nos ta, aunke cu nos tambe ta enfrenta problemanan y preocupacion como hoben.

Un di e cosnan cu personalmente ta preocupante pa mi persona, ta e presion cu mi ta sinti di sa cu tur loke mi haci como un hoben lo afecta ken mi lo ta como un adulto. Tur decision cu mi haci, lo defini mi futuro como un adulto, y esaki por ta hopi dificil pa un hoben. Ademas, nos ta ser husga pa otro hobennan, ken hopi biaha ta critica con nos ta bisti, of nos fisico y te hasta con nos ta actua den publico. Nos ta crea insiguridad, cual por causa un multitud di preocupacion, specialmente mentalmente y dentro di nos mes.

Apesar di tur esey, mi ta sinti mi mes hopi afortuna di ta un hoben femenino. Tin hopi hende muhe rond di mi y den mundo cu constantemente ta pone un ehempel dilanti mi cu como hende muhe no tin nada cu nos no por cumpli. Esaki ta mi motivacion y inspiracion pa sigui crece y bira e miho version di mi mes cu mi por ta y pa algun dia por cana entre e gran muhenan cu mi ta admira awe.