Diahuebs siman pasa College Financieel Toezicht (CFt) pa Aruba a bishita nos Horacio Oduber Hospital (HOH). Presidente sr. Raymond Gradus y miembro diputado di Hulanda sr. Hans Hoogervorst hunto cu nan delegacion a ricibi un recorido den HOH.
Durante e recorido nan a demonstra hopi interes den loke ta e parti di construccion y specialmente e retrasonan, e finansa y e partinan di Hospital cu no a wordo inclui den e renobacion. Cu hopi orguyo coleganan di HOH a mustra e delegacion nan departamento. Nan a conta tocante e presion halto riba cuido pa motibo di Covid-19, e estilo di bida no saludabel riba e isla, mas accesibilidad di e prome linea di cuido cu falta y tambe e falta di atencion pa un cuido miho organisa pa nos grandinan. Tambe a mustra e cambionan cu a haci na HOH cu a resulta den un mehoracion di calidad y hospitalidad den Hospital.
Durante e combersacion cu directiva a papia mas tanto tocante ‘good governance’, e parti financiero di hospital y e retonan local y mundial pa loke ta cuido. A papia amplio riba e importancia di mantene un balansa adecuado entre retonan financiero y tene e calidad di cuido halto. A splica loke Hospital ya caba a haci pa traha na un forma mas eficiente y efectivo. No solamente pa traha mas eficiente pero tambe pa enfrenta e recortenan cu AZV a impone riba cuido na Aruba. Den mesun rosea a papia di e volumen y financiamento di cuido door di AZV. Esaki ta trece cu ne e importancia pa tin un discusion basico cu otro riba ki tipo di cuido Aruba por carga y bou ki gasto.
“Campañanan grandi di prevencion pa un miho estilo di bida cu resultado cu menos hende ta bira malo y consecuentemente gastonan den loke ta cuido medico tambe lo baha. Mescos tambe por pensa riba un contribucion di parti di turismo pa cuido general y cu esey, pa e comunidad di Aruba,” asina director di Hospital sr. Jacco Vroegop ta declara.
A para ampliamente keto riba e preocupacionnan cu tin riba tereno di suficiente personal y personal cualifica. Formacion ta esencial aworaki pero tambe den e siguiente añanan pa keda brinda cuido na comunidad. Sin embargo tin poco persona na Aruba cu ta scoge pa un carera den cuido y esaki ta rekeri un atencion enorme pa stimula nan pa trece un cambio den esaki. Ademas, e salarionan y cantidad di ora di trabou no ta cuadra mas cu otro paisnan di unda e personal di cuido ta bin. E inflacion creciente y aumento di costo na Aruba no ta yuda tampoco pa convence nan pa muda pa Aruba. Pues a palabra siguramente pa tin un colaboracion mas estrecho entre CFt y HOH, unda cu un mantene bista den loke ta personal, e produccion di nos hospital, finansa, ‘governance’ y calidad di cuido lo keda central.
