Un pelea pa motibo cu no por a drenta e club Olde Molen cu un boter di Night Train a caba cu un bida y destrui hopi otro. Esaki ta e conclusion diabierna pasa ora hues a trata e caso di Yellow y e otro sospechoso Van den Berg, un caso cu a shock comunidad.
Acusadonan Trenidad “Yellow” y Van den Berg a comporta hopi tof y sigur di nan mes den sala di corte. Hopi poco a wordo bisa pa ambos. Van den Berg ta nenga di tabata presente y te a duna arma y Trenidad ta nenga di a tira bouncer; mi a tira na shelo, e ta bisa.
Presente na momento di trata e caso tabata diferente familiar di e victima cu a bisa hues ora el a puntra, cu nan no ta pidi pa compensacion, asina di biaha a cuminsa trata e caso. Sr. Van den Berg su abogado a bandona e caso y pues e no tabatin abogado e hues a informa. A puntr’e si e kier uno y el a bisa cu e no tabata kier abogado tampoco. A parce cu hues a bis’e cu e no ta obliga pa duna un motibo, e hues ta interesa pa sa dicon e no kier uno mirando e acusacion fuerte cu tin contra dje (complice asesinato). Su contesta tabata: “Mi mes ta para tras di mi cos”.
Tira na laira
E hues a opta e ora pa cuminsa cu Sr. Trenidad cu ya for di e prome pregunta tocante localnan a tuma luga e anochi na Olde Molen, e no kier a contesta e hues y a bisa cu tur locual e tin di bisa ta riba papel. Prome cu a continua hues a verifica si e ta desea di contesta mas pregunta of ta bay referi cu tur cos ta riba papel, el a indica cu e ta contesta preguntanan.
Sr. Trenidad a bisa cu e arma el a coy e for di abou cu lo a cay for di un bouncernan durante di e pelea y no sa cu el a tira un hende, e djis sa cu el a tira na shelo. Hues a bolbe puntr’e si el a tira na shelo of na hende cu tabata riba dje. El a enfatisa cu e no a tira na hende, sino na shelo. A mustra Sr. Trenidad cu por tin chens cu nan a bin den caminda, pero si bo tira un hende cu ta riba bo, bo ta spera cu e lo cay riba bo e ora, el a bisa cu esey e no a ripara of tuma nota di dje.
Patologo
Segun rapport di patologo, e fayecido a ricibi tiro den pecho y den lomba, cu esaki hues ta mustra cu e storia cu Sr. Trenidad ta bin cun’e e ora no ta cuadra cu e rapport. Hues a bisa cu e no ta compronde con esaki (tiro dilanti y patras) por, si bo ta tira den shelo.
Detaye di pelea
Sr. Trenidad tabata bisa tambe cu e no a start cu e pelea y cu e no sa e motibo cu nan kier a saca su persona di e club. Na final a bin dilanti cu tabata pa motibo cu e tabatin un boter di bebida Night Train cu e kier a bay paden cun’e, cu e bouncernan a bisa no mag. Asina tambe tabatin diferente declaracion di testigo di e pelea na Olde Molen, cual Sr. Trenidad a bisa cu e storianan no ta berdad, nan ta gaña etc. y no a bay den detaye. El a keda duna contesta hopi cortico durante e tratamento di e caso y a referi na su declaracionnan cu segun e hues ta contradeci otro.
Na dado momento Sr. Trenidad a pidi pa bisa algo y el a papia den bos halto: “E guy aki (Van den Berg) no tin nada di haber cu mi, tur loke nan ta bisa ta gañamento”. E ta referi na e hecho cu diferente testigo ta bisa di a mira Sr. van den Berg dun’e ‘algo’, posiblemente e arma di candela,e anochi ey.
Ora hues a bay over na presenta e caso pa Sr. Van den Berg, a bis’e cu testigo a mir’e ta discuti cu su grupo di amigonan Sr. Trenidad net prome cu e incidente fatal. Hues a puntr’e si tabata tocante di e arma nan tabata discuti, y a bis’e cu si tabata asina e no ta wordo mira como complice den caso cu e arma a wordo kita for di dje. Sinembargo Sr. Van den Berg a keda para firme cu e no tabata eynan y a bay cas ya mas cu un ora prome cu e incidente.
Evidencia
Siguientemente hues a mustra un video den e sala algun minuut prome cu e asesinato cu lo mester prueba cu ta Sr. Van den Berg tabata na e sitio den parkeerplaats canando bay na e pelea. A pesar di esaki el a nenga cu esaki ta su persona riba e video. Mester bis cu e video ta mustra shinishi, y calidad hopi abou. No por wak cara di ningun persona, solamente forma di curpa, manera di cana etc. Unico detayenan cu a resalta cu hues por a mustra riba dje, ta e figura di e persona cu tin cabey largo mara mescos cu Sr. Van den Berg tin mara den corte. Segun Sr. Van den Berg esey no ta bisa nada, pasobra tin mas hende cu cabey largo.
Pa loke ta potretnan di arma obteni for di telefon di Sr. Trenidad su telefon celular, el a bisa cu el a download nan for di internet. Sr. Van den Berg tambe tabata para cu arma riba potret pa cual el a bisa ta di ‘airsoft’ y no ta di berdad
Asina e caso a sigui cu diferente pregunta haci pa hues y fiscal, cuestionando ambos nan fascinacion of no cu arma, nan situacion personal, agresividad, uzo di droga/alcohol, strafkaart (niun ta first offendor) etc. pero tambe cu Sr. Trenidad a sconde pa 2 luna y tambe tabata envolvi den un pelea na Moomba Beach e mesun anochi ey prome cu esun na Olde Molen. Fiscal a pone enfasis riba e parti aki pa mustra cu Sr. Trenidad tabata problematico henter e anochi ey. Awo ta keda pendiente pa aki 3 siman tende e sentencia. Sr. Trenidad cu ta deteni den exterior a bisa cu e no mester ta presente pa esaki.
Cargo
Fiscal ta haya cu Milanchelo Trenidad ta culpabel di a tira y mata Bouncer Aldwin Damian y a intento di asesinato di un otro bouncer A.M. kende a consecuencia a keda handicap (paralisa). E fiscal ta pidi 18 aña pa Sr. Trenidad considerando cu a kita bida di dos persona. Pa loke ta Van den Berg, ta pidi castigo di 2 aña pe como cu e fiscal a indica cu no tin suficiente pa prueba cu ta e a duna Sr. Trenidad e arma di candela cu a mata un bouncer e anochi ey na Olde Molen y a herida otro gravemente, pues ta persigui’ e pa posesion di arma di candela.
Riba e imagen por mira Sr. Trenidad (robes) y Sr. Van den Berg (drechi), obteni for di Facebook 5 di december 2015.
