Ayera Parlamento di Aruba a sigui cu e debate riba e cambionan cu gobierno a introduci den e ley di Serlimar di 2005. Sinembargo, no a yega na un conclusion, ya cu poco pasa di 7or di anochi e reunion a keda posponi indefinidamente.

E escenario tabata casi mescos cu dos siman pasa, ora cu Parlamento a cuminsa delibera riba e cambionan den e ley aki. Presencia di Polis tabata bisto, y un tribuna dividi entre trahadonan di e compania estatal Serlimar y trahadonan di e companianan priva EcoTech y EcoGas a sigui identifica e polarisacion cu e ley aki a trece cune. Otro elemento cu a hunga un rol tin di haci cu problema tecnico durante e transmision di e debate, caminda varios biaha esaki a keda suspendi.

Manera a wordo premira, minister encarga cu Serlimar, Otmar Oduber a bin cu notanan di cambio, mientras cu Parlamento a bin cu amienda tambe.

Igualmente cantidad di pregunta a bin for di miembronan di e diferente fraccion. Un Parlamentario cu practicamente a bombardia e minister encarga cu Serlimar cu pregunta tabata ex Director di Camara di Comercio (KvK) y miembro di fraccion di MEP, Daphne Lejuez. E parlamentario aki, cu ta forma parti di e fraccionnan den coalicion, a yega di trece dilanti su cuestionamento contra e ley controversial aki paden y pafo di Parlamento.

Ya caba for di inicio di e reunion publico aki un ambiente politico tabata domina e ritmo di e debate. Presencia di Prome Minister, Evelyn Wever-Croes sinta na man drechi di su colega di Infrastructura y Medio Ambiente, Otmar Oduber, a hunga un rol pa mantene union y controla diferencia politico den e coalicion di gobierno. Premier Wever-Croes su salida y entrada for di e sala di Parlamento tabata coincidi cu e otro miembronan di e fraccionnan di coalicion.

Sinembargo, no a somete e ley na votacion, pasobra tur cos ta indica cu no tabatin sosten di tur miembro di fraccionnan di coalicion di gobierno pa logra e 11 voto necesario pa pasa e ley controversial aki.

Fraccion MEP.
Ayera lider di fraccion di MEP, Rocco Tjon a declara na Bon Dia Aruba cu unabes cu nan a bin cu cambionan den e ley menciona, e producto final a wordo comparti no solamente cu e miembronan di e diferente fraccion di e coalicion di gobierno, sino tambe cu e coalicion di oposicion AVP.

El a bisa cu despues di e prome ronda den Parlamento dia 2 di october ultimo, nan a consulta cu demas miembronan di nos organo legislativo, pero tambe cu e bureau di Minister Otmar Oduber, pa yega na un producto final. Ainda den oranan di traimerdia el a yega di bisa na e matutino aki cu den total tabatin dos nota di cambio, caminda ya caba durante e prome reunion Oduber a yega di presenta e prome, y ayera a entrega e dos. Y fraccion di MEP lo entrega un amienda.

Tabatin alrededor di 6 pa 7 punto di preocupacion cual den e caso aki, fraccion di MEP hunto cu e bureau di e mandatario en cuestion, a yega na un consenso pa formula algun di e puntonan di preocupacion den un nota di cambio, y cierto puntonan den un amienda.

E amienda tin di haci cu eficiencia di Serlimar, caminda cada mita di aña Serlimar mester presenta un relato financiero na Parlamento. Adicional e parti di incinerator a wordo kita for di articulo C pa saca afo e discusion riba incinerator for di e ley di Serlimar. Tambe e parti di cobransa pa e negoshinan grandi y chikito, y con nan ta haci e diferencia riba e prijs.

Igualmente Tjon a indica cu manera semper nan ta haci, tur amienda cu nan ta entrega nan ta purba di busca sosten cerca tur fraccion den Parlamento, incluso fraccion di oposicion di AVP a wordo inclui den dje, ora yega na votamento. Encuanto si tabatin un consenso entre e miembronan di nan fraccion, Tjon a laga sa cu semper a resalta cerca nan partido cu nan parlamentarionan ta liber pa vota na final di dia, segun nan conviccion di loke nan ta pensa cu ta lo miho.

Tjon a laga sa cu tur e proceso riba maneho di desperdicio riba nos isla ta uno cu ya caba tabata andando mas cu un aña y mey, caminda e mandatario a bin varios biaha den e comision fiho den Parlamento pa duna un splicacion.

Fraccion AVP.
Pa fraccion di AVP, a pesar di e notanan di cambio y amienda cu a bin den e ley di Serlimar ayera, e no ta aceptabel. Pa fraccion di AVP e ley ta uno ‘discriminatorio,’ ya cu nan ta saca un compania local afo pa bin cu un compania no local aden. Ademas nan ta premira cu manera cu e ley su producto final a wordo presenta, Serlimar ta bay haya problema den futuro.

Pa lider di fraccion di AVP, Marlon Sneek e echo cu nan ta kita e parti di incinerator for di e ley, no ta haci niun diferencia. Tampoco e parti cu nan a saca afo e parti di exclusividad di Serlimar, y tambe e reparticion di e tarifa di 25 florin pa e servicio a wordo split asina: 10 florin pa maneho di sushi y 15 florin pa recogemento di sushi.

Sneek ta haya cu independiente di e notanan di cambio y amienda presenta, tin un negociacion andando pa bin cu un incinerator como unico sistema pa procesa sushi. E ta haya cu e mandatario no ta sincero cu Parlamento. No tin niun otro opcion of posibilidad pa determina kico ta e miho manera pa procesa sushi na Aruba. Tin e destaho publico caminda e unico opcion cu tin ta incinerator. Ademas e ta haya cu si awe Serlimar no por draai cu 25 florin, dificilmente e por draai cu 15 florin, pues esaki lo crea mas problema financiero pa Serlimar.

Igualmente riba e parti di e nota di cambio pa kita e parti di e palabra na Hulandes ‘enige’ for di e ley di Serlimar of exclusividad. Segun Sneek den e oferta cu tin pa e destaho publico ta skirbi cu tur sushi lo bay pa e compania encarga cu e incinerator, y logicamente gobierno mester cumpli cu nan. Na final di dia, ki bal cu e parti di exclusividad a wordo saca afo di e ley, pasobra den e politie verordering ta para unda tur sushi mester bay. “Kier men e no mester ni di e ley pa dicidi cu ami ta manda tur sushi pa e compania ey,” el a bisa. Pues via e politie verordering e mandatario por firma unda tur e sushi por bay, incluso pa e compania cu ta gana e bid pa bin cu un incinerator grandi.