Post Aruba ta pidi pueblo pa tene cachonan mara y leu di postbus. Bon Dia Aruba ya a publica esaki caba despues di un entrevista cu e gerencia.
Pero te ainda nan tin problema cu cachonan canando los. Segun Post Aruba, pa hopi aña caba e partidonan di carta ta confronta nan mes cu ‘un situacion basta incomodo cu ta stroba nan di haci nan trabao debidamente y eficientemente’.
Tin trahadonan cu a wordo ‘persigui, ataca y mordi pa e cachonan cu tin dilanti di cas of den cura’, Post Aruba ta bisa. “Otro a yega di cay kibra su pia cu e scooter purbando di huy di un cacho cu a purba atake.”
Y no ta solamente esey. Nan ta bin ta topa cu casnan cu no tin postbus of cu e cachonan paden den cura ta stroba nan di bay deposita e carta of paki. Ta pa e motibonan aki cu Post Aruba kier conscientisa comunidad pa wanta nan cachonan mara, paden, y no den cercania di e postbus.
Banda di esaki e peticion ta bay pa esunnan cu no tin postbus pa laga instala of pone un postbus dilanti di cas. Haciendo esaki lo evita pa ora cu e partidonan bay entrega post nan mester lag’e caminda nan por perde, bula cu biento, muha cu awasero, of nan no ta lag’e mes pa siguridad di e cliente.
