Diamars atardi ariba nan pagina di Facebook, organisacion Aruban Warriors – Movemento Indigena Arubano a publica un potret, di un otro usuario di Facebook, na unda por mira cu na un beach publico doñonan di un negoshi cerca di lama ta purba pone un stanchion post como barera pa evita cu hendenan ta sinta na e parti di e beach ey.
E tema di beachnan publico y hendenan cu kier purba “privatisa” e beachnan aki pasobra nan ta cerca di nan cas of negoshi ta un tema cu ta andando pa hopi tempo caba.
E ultimo incidente ta esun cu Aruban Warriors a trece pa dilanti. E hecho aki a causa hopi reaccion, sobretodo di ciudadanonan local cu pa hopi tempo tambe na diferente ocasion a vocifera nan malcontento pa cu situacionnan asina y ta bringa pa por haci uso di e beachnan, pasobra manera ta conoci, ley mes ta bisa cu tur beach na Aruba ta publico y no por wordo privatisa.
“Yama polis y nan ta laga e doño kita nan di biaha paso beach ta pa tur hende y no pa negoshi y nan tereno ta caba unda e walkway ta y e resto ta publico,” un usuario a indica, señalando loke hopi a resalta y loke hopi ta na altura di dje tambe, cu e tereno priva di un negoshi ta caba na cierto liña, casi semper ora e walkway di e negoshi ta caba y for di eynan e beach ta publico.
“Ta kico esaki a para bira awo? Nos Arubano nan mester lanta for di soño. Nos lanta ariba. Nos mester pasa rangsap tur cu kier bin haci doño di nos beachnan. Y tur gobierno cu sinta, ta laga hopi di desea pa nos pueblo. Aruba ta di NOS,” otro usuario a expresa.
Hopi di e comentarionan ta demostra e disgusto di e ciudadanonan local cu ya ta cansando di e situacionnan asina cu ta keda sucede, na unda como local na algun ocasion nan ta haya hechonan desagradable asina y ta interumpi nan di disfruta di e beachnan publico di Aruba libremente.
“Poco poco pero sigur e baina aki ta sigui. Un tipo di kolonisatie of ta landje pik?” ; “Ta ki kens e cos aki ta? Playa y aire y lama ta pa tur hende bibando na Aruba. Ta Dios e señora ta kere e ta?” ; “Mi a kere cu tur beach rond di Aruba ta pa pueblo y pa tur hende sinta/tuma solo unda nan kier. Ultimo mi a tende e beachnan rond di Aruba bo mag baña unda bo kier. Gobierno tin cu buta den ley beachnan ta free pa tur,” ta algun di e otro comentarionan cu e usuarionan a publica ariba e publicacion aki.
Otro comentarionan ta: “Awel nos tin cu lanta defende nos luga cu ta lama y beach ta di nos e ta y ningun doño por bisa nada. Donder op” ; “Gobierno mester manda cartanan fuerte pa hotel y negoshinan ariba beach. E ley no ta negoshabel” ; “Parce e no a lesa loke un polis a bisa un hotel poco dia ey, esta cu tur beach ta publico y esey nos tur sa.”
E ultimo comentario aki ta referi na un caso na unda dos persona kier a haci uso di un palapa na un beach publico dilanti un hotel, pero e security di e hotel a bisa e personanan aki cu nan no mag di usa e palapa pasobra e ta di e hotel, a pesar cu e beach ta publico.
Esaki ta otro tema cu tambe a bin pa dilanti na varios ocasion na unda hotelnan cu ta pone palapa ariba beachnan publico no kier pa otro hende, cu no ta e turistanan cu ta hospeda na nan hotel, usa e palapanan, aunke nan ta riba un beach publico.
Pa e caso specifico aki, polis a interveni y a coregi e security di e hotel informando e cu e hendenan por haci uso di e palapa pasobra e ta riba un beach publico y no ta pasobra cu e hotel a pone e palapa eynan, e ta priva y pues nan por haci uso di e palapa libremente.
Algun tempo atras, Bon Dia Aruba a publica tocante otro situacion similar na unda doño di un cas cu ta keda dilanti lama na Savaneta a pone un aviso indicando cu e pida tera su dilanti, esta e lama, ta propiedad priva y cu ningun hende no por pasa.
E publicacion aki tambe a ricibi un ola di comentario di parti di comunidad mustrando nan malcontento y frustracion pa e situacion, cu ya ta birando repetitivo na diferente parti di Aruba.
“Pero asina tin mas cas ey banda cu ta haci mescos. Tin full tereno tras di nan cas cera y ta haci doño”;“Ningun beach of lama tin doño. Propiedad di pueblo.”; “Spera cu nan pone nan lanta e mata nan cu nan a corta benta riba e pasada ey, spera nan haya boet tambe bo cas bao cura por ta priva no e baranca ni e lama.”
Manera menciona caba na Aruba tin e ley ‘Landsverordening openbare wateren en stranden’ (Ordenansa nacional awanan publico y nos playanan) cu ta stipula cu tur lama na Aruba ta publico. E ley ta dicta: “den e ordenansa aki y e disposicionnan basa riba dje ta compronde cu awa publico ta awa cu ta accesibel na tur, limita of no, den virtud di normanan di derecho publico.”
