Siman pasa residentenan cu ta haci uso frecuente y diario di e caya na Franse Pas a mira cu un biaha mas a busca un solucion temporario na luga di finalmente bin cu un solucion duradero pa e problemanan cu e caya aki.
Franse Pas ta un area cu semper tabata un topico di combersacion pa varios motibo. Entre e motibonan aki tin e leyendanan urbano tocante actonan satanico, fantasma, e accidentnan cu ta sosode den e area, e falta di luz y e situacion precario di e caya. Un tempo atras, a drecha un parti di e caya aki, cual ta e parti cu ta hiba na Spaans Lagoen, sinembargo e pida cu a drecha ta caba asina cu sali for di e area chikito aki. Na momento cu cuminsa e ruta den direccion di Pos Chikito of e ruta cu ta conecta na e caretera principal rumbo Santa Cruz, e parti cu a drecha ta caba y e parti di e caya cu un calidad sumamente precario ta cuminsa.
For di hopi tempo caba, hasta prome cu a haci e areglo selectivo anteriormente menciona, e caya aki constantemente ta yen di buraconan profundo y extenso. E caya aki ta regarda como uno cu no solamente ta peligroso, pero tambe dañino pa e vehiculonan cu ta haci uso di esaki. Esaki ta pa motibo cu ta practicamente imposibel scapa di e buraconan, sin menciona e falta di luz cu tin riba un gran parti di e ruta aki den oranan di anochi.
Cada pasa un tempo, e residentenan ta bin ta mira cu na luga di drecha e caya, di mesun manera cu a haci cu e otro parti di esaki, ta scoge pa solamente yena e buraconan mas profundo y lag’e te ey. E problema cu esaki ta cu entre e uso di e caya aki conhuntamente cu yobidanan, e buraconan gradualmente ta bolbe habri y e problemanan ta bolbe persisti pa hopi tempo te ora cu ta tuma e decision di bolbe yena e buraconan atrobe. Recientemente, a bolbe mira e metodo aki usa, unda cu e buraconan mas grandi di e caya a ser yena atrobe, mientras cu e resto di e caya su calidad ta sigui uno precario y dañino pa e vehiculonan.
E residentenan a expresa disgusto cu e situacion aki, mirando cu no ta mustra cu tin un solucion duradero pa esaki den consideracion ni den bista. Un di e usuarionan diario di e caya aki a expresa cu “tur dia mi tin cu pasa via Franse Pas pa por hiba mi yiu scol, y tur dia mi tin cu tende golpinan den mi auto causa pa e buraconan y mal condicion di e caya. No ta importa con poco poco bo core, bo ta cay den e buraconan y bo ta sinti e auto ta bula pa via di e mal condicion di e caya.”
E problema aki no ta solamente sinta den e impacto riba e vehiculonan, sino e impacto cu ta bay mas leu ainda, cu un usuario expresando cu “e ta duna’mi rabia paso bo ta paga tanto placa tur aña pa bo auto pero no tin e decencia di mantene e cayanan cu bo tin cu usa drechi. Mi a cumpra auto nobo y ya caba mi tabata mira mi auto afecta pa e mal condicion di e caya. Awo mi tin cu desvia tur mainta y coy caminda largo, gasta mas gasolin y tempo djis pa mi no daña mi auto na Franse Pas.” E problema di e caya na Franse Pas tin impacto te hasta economico riba esnan cu mester haci uso di e caya aki, pa motibo cu manera a declara, mester tuma rutanan mas largo di loke ta necesario pa por evita usa e caya aki. Tambe esaki ta duna un bista poco bunita pa nos bishitantenan. Despues di core riba cayanan manteni y bunita, si nan kier bishita e atraccionnan manera Spaans Lagoen, e mina di oro y/of djis conoce Franse Pas pa e historia cu tin su tras, nan tambe tin cu haci uso di e cayanan aki den mal condicion, y awo cu pidanan di asfalt nobo cu ta resalta e hecho cu tabatin buraco, algun di nan grandi y profundo, cu mester a yena.
E solucion temporario aki, cu segun esnan cu ta haci uso di e caya aki no ta dura hopi tempo, a causa mas disgusto pa motibo cu recientemente a anuncia cu a drecha e caretera di Palo Marga. Aunke e presupuesto pa e areglonan aki ta bini for di diferente cartera, nan ta expresa cu “ta imposibel cu tin mas consideracion pa un caya cu ta pa pustamento cu un caya cu pueblo ta usa tur dia. Ora mi a wak e buraconan un biaha mas yena despues di a lesa e noticia aki, mi a sinti mas desapunta ainda. E no ta logico cu te ainda den aña 2024 ta dicidi di djis yena e buraconan y no drecha e caya pa caba, mientras nos autonan ta sigui cay den buraco, daña, y toch nos tin cu sigui paga yen impuesto. Ta unda e placa ey ta bay anto?”
Aparentemente esaki ta un solucion cu ta usa cada pasa un tempo, mas tanto despues di temponan di yobida fuerte unda e buraconan aki ta empeora segun e usuarionan ta conta. Nan ta haci un yamado na gobierno pidiendo un splicacion dicon ta tuma e decision aki na luga di “tuma e tempo necesario pa drecha e caya” y asina no tin cu “worry mas.” Tambe nan ta pidi un aclaracion di unda e placa cu ta paga relaciona cu e vehiculonan ta ser inverti y dicon esaki no ta refleha den e mantencion di e cayanan di Aruba, mirando cu di mesun manera cu Franse Pas tin varios otro area na Aruba cu ta sufri di e mesun condicion.
