Pronto un entidad bancario nobo lo habri su porta na Aruba. Ta trata di First Caribbean Internacional Bank (CIBC) cu lo bin cu su oficina principal na altura di e rotonde di Tanki Flip pa bay Noord.
Vice-presidente di Asociacion di Bankeronan di Aruba (ABA) y director di RBC Bank, Pierre Rafini ta declara na Bon Dia Aruba cu e presencia di un banco nobo riba nos isla ta duna un bon indicacion di nos economia.
“Banconan unabes cu nan kier inverti of establece nan mes den un pais, ta pasobra tin indicacion cu economia t’ey y e futuro ta mustra bon.”
Encuanto si nos economia ta bayendo bon cu ta crea espacio y un bon indicacion pa un banco nobo por bin opera riba nos isla, sr. Rafini a laga sa cu aunke nos economia no a crece tampoco e no a duna un cifra negativo. E ta alrededor di 0.4% segun ultimo informacion di Banco Central Aruba.
El a agrega cu si nos ta wak e cifra aki den termino di porcentahe, e ta basta “flat y e no tin crecemento”. Pero si nos ta compara nos economia cu paisnan cercano y den nos mesun region, caminda tin cero crecemento of crecemento negativo, mientras cu nos a mantene of crece un tiki, ya ta algo hopi positivo pa cualkier inversionista cu kier bin Aruba.
Sin conta tambe e pronostico cu e posibel apertura di e refineria ta trece cun’e. E refineria aki lo bay emplea directamente alrededor di 600 pa 700 empleado cu tabata locual e refineria Valero tabata emplea directamente. Pero tambe e lo crea trabou indirectamente pa 1800 hende na servicio di e contratistanan. No solamente empleadonan so; sino e inversion cu e operado di e refineria tin cu haci den ekiponan ta un adicion grandi pa nos economia, segun e bankero.
Aunke Bon Dia Aruba kier remarca cu tin cierto aspectonan cu ta trece insiguridad pa e reapertura di e refineria (por lesa esaki riba A5 di e edicion aki).
Mas competencia
E echo cu un banco nobo lo establece na Aruba segun sr. Rafini, ta un echo importante y e ta saludabel pa e mundo bancario na Aruba. Y ademas e ta pone tur banco traha mas ariba nivel di servicio pa asina nan por competi mas miho.
Di otro banda e ta haya cu pa un cliente e apertura di un banco tin un beneficio agrega. Ya cu e ta trece mas competencia y logicamente e clientenan lo haya mas oportunidad pa scoge.
“E por pone un presion riba e banconan pa competi mas duro.”
Sr. Rafini a laga sa cu e tipo di competencia aki no ta solamente den forma di baha interes sino den productonan bancario, y tambe servicio cu ta un factor hopi importante den e mundo bancario di awendia. Ya cu no solamente ta e competencia riba interes, sino riba e servicio, ya cu un entidad bancario cu no ta duna un bon servicio no tin un garantia di existencia na largo plaso.
E ta bisa cu e ehecutivonan di CIBC a wordo invita caba na un reunion di ABA. Den reglanan di e asociacion aki ta stipula cu manera un entidad bancario ta haya un licencia pa opera na Aruba, automaticamente e ta bira un miembro. Varios luna pasa nan a sostene un reunion a caba, caminda ehecutivonan bancario di CIBC a introduci nan mes cerca ABA.
Awor ABA ta na espera di e apertura oficial di CIBC pa nan por sinta formalmente hunto como miembro di e asociacion aki cu ta defende e interes di e sector bancario riba nos isla. Den e reunion aki nan por wak como asociacion bancario, con nan por sigui stimula economia di Aruba.
