Un bahada fuerte den inscripcion di MBO ta causa preocupacion

(NLTimes) – Inscripcion den enseñansa profesional (MBO) na Hulanda a baha mas lihe cu a premira, loke a bati alarma cerca educadornan y expertonan riba mercado laboral. MBO Raad a informa cu e cantidad di studiante a baha cu 1,900 e aña aki, bahando na 467,500 for di 469,400 na 2022. Esaki ta mas cu e bahada di 1,500 cu e conseho a anticipa.

E bahada ta atribui parcialmente na cambionan demografico, cu menos adulto hoben ta drenta e sistema di enseñansa. Sinembargo, presidente di MBO Raad, Adnan Tekin, ta kere cu actitudnan di sociedad tambe tin e culpa. “E mentalidad cu ‘mas halto ta miho’ ta persisti ainda, y enseñansa profesional no ta hayando e reconocemento cu e merece. Nos ta sospecha cu hopi graduado di VMBO a opta pa HAVO en bes di MBO.”

E cifranan cu ta bahando ta causa preocupacion den sectornan clave manera cuido di salud, tecnologia y construccion. “Esaki ta nos trahadonan cualifica, y scarsedad riba e terenonan aki ta alarmante caba,” asina Gertrud van Erp, un experto den educacion cu VNO-NCW y MKB-Nederland a bisa. “E consecuencianan ta visibel den cuido di grandinan y e sector di edificio, caminda nos mester desesperadamente di profesionalnan capacita.”

E MBO Raad a enfatisa cu sectornan manera cuido medico, bienestar, deporte, y tecnologia ta particularmente afecta. Tekin a adverti cu elimina stage di cuido pa 2028 lo disminui mas ainda e interes den educacion di cuido di salud.

Pa atende e bahada di inscripcion, Tekin ta sostene pa introduci klasnan amplio di dos aña di brug na scolnan secundario. Esaki lo duna studiantenan mas tempo pa explora nan interesnan prome cu haci escogencianan cu ta defini nan carera. “Rutanan practico por conduci na mas felicidad y miho perspectivanan di carera pa hopi hoben cu rutanan teorico,” el a splica.

Van Erp a sugeri pa introduci incentivonan financiero pa guia studiantenan den sectornan cu scarsedad agudo di labor. “Programanan pa terenonan di demanda halto por ser haci mas pagabel, mientras cu por pone limite di inscripcion riba disciplinanan menos necesario,” el a bisa.

Adicionalmente, Tekin a propone pa permiti e studiantenan di VMBO tuma un ‘gap year’, un privilegio cu actualmente ta disponibel solamente pa graduadonan di HAVO y VWO. El a argumenta cu esaki por encurasha mas studiante pa scoge enseñansa profesional despues di deliberacion pensativo.

Un porcentahe halto di dropouts bou di graduadonan di HAVO cu ta drenta programanan di MBO tambe ta destaca e necesidad pa sosten adicional. Tekin a pidi pa aumenta financiamento di ministerio di Enseñansa pa programanan di transicion pa yuda e studiantenan aki tin exito. “Miho guia ta crucial segun cu nan ta move di VMBO of HAVO pa MBO,” el a bisa.

Expertonan ta di acuerdo cu un miho promocion di MBO como un trayecto di carera valido y gratificante ta crucial. “Ta esencial pa scolnan secundario presenta MBO como un opcion serio durante sesionnan di conseho di carera,” Tekin a bisa. “Esaki mester sucede mas hopi, incluso pa studiantenan di HAVO.”