Un averahe di 15 mil solicitud di permiso procesa pa aña

Durante tratamento di presupuesto complementario, Minister di Husticia Andin Bikker a keda pendiente pa duna Parlamento e cifra exacto di solicitud di permiso di persona di afo cu a bin traha y establece den nos isla. Sinembargo el a laga sa cu un averahe 15 mil solicitud ta wordo haci pa aña.

Pa loke ta e peticion pa asilo, Bikker a contesta Parlamento cu nan a haya den direccion di 1,900 solicitud. Sinembargo tin persona cu ta pidi pa su señora y tambe pa nan yiunan, cu ta extende e cifra aki un poco.

E mandatario a referi cu e situacion na Venezuela tin su influencia riba e peticion di asilo. Ora cu e gabinete actual Wever-Croes a asumi su responsabilidad, el a splica cu nan a topa un situacion cu Pais Aruba tabatin leynan hopi anticua. Leynan cu nan mester a cambia, ya cu e no tabata un ley bon formula. E tabata tempo cu Pais Aruba tabata haya un averahe di 1 pa 2 solicitud di asilo anualmente.

Pero desde cu e situacion a sigui scala na Venezuela, nos isla a bin confronta un cantidad masal di hende cu a bin solicita, ya cu e ley cu tin di haci cu asilo tabatin articulo den dje cu practicamente tabata invita pa solicita, debi cu nan lo por a gosa di cierto derechonan of beneficio bou e tratado internacional.

Den cuadro di e situacion aki -Bikker a informa Parlamento- dia 3 di juli ultimo gobierno a introduci un maneho y un ley completamente nobo, cu ta regula e otorgamento di asilo basa riba e modelo di Hulanda.

Pues si un persona ta bin via por ehempel Panama of Colombia -cu ta miembro di e tratado di Cartagena- caminda e migrante ta wordo salvaguardia of protegi caba, si nan ta hustifica cu si nan ta bolbe Venezuela nan ta core peliger. Pero si nan ta bin Aruba, nos autoridad por regresa nan bek sea pa Panama of Colombia. Pasobra for di e paisnan cu nan a bin, ya sea Panama of Colombia, nan tabata protegi caba.

Pa loke ta e persona conoci como ‘balsero’, cu ta yega cu boto na nos fronteranan, ya sea tambe via avion of barco, nos autoridad por wanta nan pa un maximo di 28 dia. Den e termino aki nan por procesa nan solicitud pa asilo. Pero e mandatario a informa Parlamento cu nan por a ripara cu mas cu 90% di e aplicantenan ta haci uzo indebido di e proceso di aplicacion pa asilo. Pasobra hopi biaha e persona ta djis purba pa larga nan estadia na Aruba, pero nan integridad personal no ta den peliger si nan ta wordo repatria.