Un Aruba di 24/7 ?

Den cierto asunto, sigur!

Den hopi aspecto Aruba ta moviendo pareu cu e desaroyonan internacional, y esey ta bon. Nos ta un di e islanan mas conecta na internet, gran parti di e ciudadano ta participa den esaki. Nos tin un variacion impresionante di television di un cantidad di pais, na diferente idioma, anto nos ta comprende gran parti di tur esey tambe.

No cu no falta cos pa cumpli ainda, semper tin espacio pa mehoracion. Nos mester sigui move den direccion di un red di glassfiber, cu parcialmente ya ta realidad. Un cable den lama mas, pa miho conexion tambe lo yuda, aunke tin hende den e sector di telecomunicacion cu ta kere cu por para e desaroyo aki. Nos tin un tremendo red di conexion aereo, pa un isla chikito asina.

Biaha bay anywhere no ta ningun problema. Hopi bon. Nos hendenan tambe a cambia. Nan a custumbra, y comercio a custumbra, cu no ta den dia so bo por shop. Mall nan ta habri anochi y diadomingo y tur caminda den tur bario tur supermercado y minimercado ta habri te laat anochi. Cualkier cos, hasta marduga bo lo por haya cierto articulo den pura. Enfin, you get the picture. E debate aki no ta tocante kico ta bon o kico ta malo den esaki. Nos por critica e cosnan cu a haci bida mas pura, mas ansha cu antes, pero ainda nos no ta ni remotamente un ciudad grandi, ni mediano den un pais grandi, den e sentido ey. Y esey no necesariamente mester cambia tampoco, ohala nos por mantene un gran parti di e estilo relaxed di bida, pasobra no ta esey ta loke nos ta ‘bende’ cu e mundo eyfo? Bo mester calma bo nervio, bin Aruba pa nos yuda bo! Sin embargo, tin e puntonan cu no a cambia den tur e desaroyo aki, cu si ta molestia nos. Y ta e cosnan aki lo mester cambia, pasobra no tin pakico di acepta nan.

Por ehemplo, a traha henter un haf nobo, specialmente pa e barconan cu ta carga container tin nan mes luga pa mara, cu tur espacio pa nan descarga y carga, masha bunita. Al menos, esey ta loke nan a conta nos pa nos tur ta contento cu e mudamento, cu tambe nos tin di paga den e proximo dies y pico aña. Pa colmo, despues di e mudanza a bin resulta cu e tarifanan pa maneha carga a subi substancialmente, pero manera semper e Arubianonan super relaxed a tuma tur esey, guli manda abao. Despues a bin henter e caos di e barconan chikito cu ta trece mercancia y hende na tal cantidad cu e cuerponan uniforma ta keha regularmente cu nan no por maneha e situacion. Esey ta algo cu nos ta kere mes ora, pasobra cualkier persona cu a yega di presencia e desorden aki, ta puntra su mes ta segun ki regla e asunto aki ta organisa. Pero awor nos ta yega na e colmo. Varios biaha caba un barco cu ta trece container na nos isla, mester a desvia bay otro destino, pasobra pa via di circunstancia, nos no sa ken tin culpa, nan no tin un espacio pa atraca y baha carga. Bunita, anto esaki riba un isla unda e unico cos cu ta yega di su mes ta biento, pasobra awasero mes ta cada tanto tempo.

Tur cos di come, bisti, etc. mester yega cu barco o cu avion. No solamente mercancia cu por tuma un poco solo y un dia extra, pero tambe container refrigera cu fruta y berdura cu no por warda! Y kico nos ta haya di tende? “Ja, jammer, pero nan a perde nan spot, no ta nos por yuda.” Y e storia di hustificacion no a caba ey: “Si, ademas si nan drenta marduga, nos mester paga overtime y … ademas, e holo di huma di WEB ta stroba e trahadonan den nan trabao…? Bueno, señores, ta kico boso kier anto? Nos ta bay pone orario pa barco drenta di 8:00 pa 12:00, y di 13:30 te 16:30? Y ‘miho nan wak nan t’ey ora nos t’ey, si no..’ Pa colmo, nos mester bay muda WEB tambe si no, no tin trabao na Barcadera, bo por kere e cos aki? Nos no tin pakico di acepta e tipo di idiotez aki, cu ta costa nos bon caro di tur manera.

Si tin tardansa, nan mester paga overtime, y nos ta hay’e despues den e prijs di producto, ta bon. Y fuera di esey, nos no tin ni idea di kico Astec ta keha, pasobra na Aruba nan cuenta anual ta un di e secretonan miho warda. Pero si ta di paga mes, ban paga pa un servicio drechi, y no pa e desorden aki. Loke nos mester ta dispuesto di paga, ta pa un servicio 24/7 cu ta resolve e problemanan cu presenta, y ta duna absoluto prioridad na e barconan di container.Pasobra e ta nos prioridad, ta p’esey a traha e haf, punto. Ta for di nos cartera e miyones mester sali pa paga pa e ‘PPP’ aki, cu mescos e otronan miho yama nan ‘PPPP’: ‘Proyecto Pa Pueblo Paga’. Nos ta pagando, ban cuminsa exigi calidad di servicio.