Un apelacion pa votadornan

Pueblo di Aruba, nos democracia ta nos forsa mas grandi, pero su calidad ta depende di nos esfuerso colectivo. Durante mas cu 40 aña nos a biba bao dominio di dos partidonan grandi, y a yega ora pa nos pone atencion na loke nos por logra cu mas diversidad den nos sistema politico.

Dominio di 2 partido so den 40 aña ta crea un oportunidad inherente di e problemanan cu corupcion, patronahe politico, ineficiencia, falta di transparencia, etc.

Den esaki nos por corda e fixmento di pensioen pa e gobernantenan, unda den 8 aña nan a keda cla cu nan pensioen y e pueblo mes, ami cu abo, mester traha mas cu 40 aña pa por haya un miserabel cachicachi for di SVB den forma di AOV – cual por cierto mester keda renoba pa cumpli cu e situacion actual. Tambe nombramento den gobierno sin base di merito, y hopi otro practica coruptivo.

Den nos historia nos ta mira demasiado corupcion. Nos a mira caso di ex-politiconan cu a keda condena pa abuso di poder, mal maneho di placa publico, soborno, y otro practicanan di corupcion. Nos tin politiconan cu ta enfrentando acusacionnan asina y nan caso ta sigui den corte. E desafionan aki no ta solamente pa nos, ta pa Aruba henter. Nos no por permiti mas cu e politiconan corupto aki ta sigui maneha e rumbo di nos pais. Nos ta mirando na un Aruba cu ta perde su confiansa, cu ta keda cu un sistema politico unda corupcion ta keda presente, unda e interesnan di un grupo ta dilanti interesnan di nos pueblo.

Pueblo no ta solamente ambtenaar

Nos mester un gobierno cu ta traha pa nos, of sikiera por controla e forma inhusto cu nos como pueblo a wordo trata. Pueblo no ta ambtenaar so, pero nos tur cu ta traha y biba riba e baranca chikito aki.

Mas partido no ta solamente duna un voz na diferente idea y interes, pero tambe ta obliga e sistema pa innova y atende e necesidad di cada un di nos. Ta den nos man, e votadornan, pa insisti riba gobernacion cu ta representa e diversidad real di nos pueblo. Por medio di vota pa partidonan chikito of nobo cu tin un programa cla y idealnan fuerte, nos por stimula un cambio cu ta enfoca riba progreso y no riba division.

Busca mas forma pa nos por ta menos dependiente di importacion, duna incentivo, cambia e forma inhusto di cobra belasting cu a haci e costo di bida incrementalmente impagabel. Cambia leynan di grondbelasting diferenciando den esnan cu ta haci negoshi, cual mayoria ta stranhero, y esnan cu ta wordo usa pa vivienda propio. Tuma ehempel e grondbelasting di e condominionan cu ta huur; dicon no ta aplica e tarifa segun e balor estableci pa e entrada?

Eleccion ta mas cu un voto

Pero lesa bon, pueblo, e cambio no ta sin riesgo. Vota cu consenshi. Examina e plan di cada partido, keda alerta pa promesanan bashi y no alcansabel, y kere den un sistema cu por crea un balansa entre diversidad y stabilidad.

E futuro ta den man di nos. E sistema por florece unicamente si nos ta haci e esfuerso di vota pa un gobernacion mas husto, mas representativo, y mas responsabel. Lucha pa un cambio, pero lucha tambe pa e stabilidad cu nos pueblo merece.

E eleccion di nos pais ta mas cu un voto; ta un oportunidad pa bo voz tin peso den e rumbo di nos futuro. Na un sistema caminda dos partido a domina pa 40 aña, unda cu no a falta corupcion den ningun di e gobiernonan, ta ora pa nos habri nos mente y explora e posibilidadnan di un sistema cu ta duna mas espacio pa idea nobo, innovacion, y un representacion mas husto pa tur hende.

Vota cu sabiduria no ta solamente pa bo aworaki, pero pa bo yiunan chikito y demas generacion cu ta bin tambe. Ta ora pa nos evalua si e sistema actual ta representa nos interesnan, of ta interesnan di e politiconan so y e patronahe cu esaki ta bin cune, y si e dos partido grandi ta cumpli cu e promesanan cu ta fortalece nos pais. Si nos ta wak atras riba e desafionan cu nos pais ta enfrenta—corupcion, falta di transparencia, y ineficiencia—nos por puntra nos mes si un sistema multi-partido por duna nos e solucion pa enfrenta esakinan.

Un voto pa cambio no ta un voto perdi
Un voto pa un partido mas chikito no ta un voto mal usa; esaki ta un paso pa crea un Aruba caminda tur idea y tur hende ta importante y tin participacion. E poder ta den bo man pa duna oportunidad na lidernan hoben, pa introduci politica cu ta comprometi cu e reto nobo, y pa forsa e sistema pa duna mas cuenta y responsabilidad na bo, e pueblo.

Laga bo voto bay mas leu cu tradicion. Bay mas leu cu e ideanan di “semper ta asina.” Bay mas leu cu

eleccion di 2024. Ban pa un Aruba caminda bo ta sinti bo representa y proteha.

Loke nos a skirbi ariba no ta un critica riba e partidonan grandi sino e falta di diversidad.
Aunke nos tin di remarca cu cambionan grandi pa e partidonan chikito tin su retonan – manera formacion di coalicion, politica oportunista, movecionnan idealista extremo y deadlock pa tuma accion importante pa Aruba.

Scoge bon pasobra e influencia di partidonan populista y oportunista ta esnan cu ta hibando nos den un abismo, unda nos generacionnan ta esnan cu lo paga pe.

Pensa, eligi, y actua pa un Aruba mas fuerte. Danki pa bo compromiso cu nos pais.