Diamars dia 16 di april ultimo Fundacion Corector di Papiamento a organisa un anochi di dedicacion y recuerdo dedica na Ramon Todd Dandaré Mag.Ling., Drs. Mario Dijkhoff (d.f.m.) y Sr. Pedro Velásquez (d.f.m.), e tres docentenan cu a duna e curso di Corector di Papiamento na 2001/2002.
E anochi aki tabata pa recorda e impacto cu e docentenan aki tabatin riba e cursistanan cu te dia di awe ta dedica nan mes na papia y skirbi idioma Papiamento corectamente. Asina e corectornan a keda traha bou di e nomber Grupo Corector di Papiamento cu a bira Fundacion Corector di Papiamento y ta haciendo trabou di coreccion pa esun cu ta desea esaki.
Tabata un anochi di kita sombre y esnan presente por a disfruta di charla y presentacion interesante y por a haya sa mas di e personanan aki.
Sr. Sergio Velásquez, a conta un tiki di bida di su tata y tambe a splica di su tata como poeta. Gregor Dijkhoff di Dijkhoff Papiamento Cursussen a papia di su tata y publico por a haya sa mas di bida di Mario, el a conta diferente anecdota cu a pone e publico hari na smaak.
Tambe Sra. Linda Richardson a haci presentacion di su buki di terminologia trilingual den area di derecho y huicio penal y el a conta di su plannan pa aña di Papiamento tambe.
Fuera di nan tabatin declamacion di poesia di dos corector y di mes esun cu no por a keda afo ta e Maestro Ramon Todd Dandaré cu a cera e anochi aki, semper Ramon cu su charlanan interesante cu a laga e publico cu gana di scucha mas.
E biaha aki Ramon a papia mas di su poesia cu el a skirbi den añanan 70 cu e titulo ‘Isla di mi’ y cu Sr. Frank Williams a traduci’e na Ingles, Sr. Frank mes a haya e oportunidad di declama esaki.
Minister di Enseñansa, Sr. Endy Croes, a entrega un reconocemento di gradicimento di parti di FCP na Sr. Ramon Todd Dandaré, un reconocemento postumo na Sra.vda. Francisca Velásquez y na Sr. Gregor Dijkhoff, yiu di Mario. Durante e anochi tambe, manera custumber, FCP a reparti un publicacion completamente gratis na tur presente.
