Dia 17 di november 2022, net un aña pasa, Fundacion Parke Nacional Aruba (FPNA) a manda un carta dirigi na prome minister Evelyn Wever-Croes, minister di Turismo Dangui Oduber y minister di Medio Ambiente Ursell Arends indicando e situacion di emergencia di Rioolwaterzuiveringsinstallatie (RWZI) Bubaliplas.

Den e carta nan a splica e deficiencianan y e peligernan cu esey ta causando tanto pa salud publico como pa turismo y tambe pa naturalesa.

Un aña pasa, nan tambe a bati alarma pa e construccion di varios hotel cu un total di 1.000 camber mas, locual lo aumenta e funcion di Bubaliplas den proximo añanan.

“FPNA ta un socio crucial pa loke ta trata diferente area, incluyendo Bubaliplas cu conhuntamente ta gestiona cu DOW, DOW ta responsabel pa gestion di awa y FPNA ta responsabel di conservacion di naturalesa y gestion di naturalesa caminda FPNA ta gusta traha di forma proactivo y resolviendo problemanan considerando Bubaliplas, saliñanan cerca y rioolnan cercano como areanan di maneho conhunto FPNA ta participa den desafionan di gestion den un etapa trempan y no ora e situacion a desaroya of un tin un crisis,” e documento tabata indica.

Nan a trece dilanti inundacionnan cu a tuma luga na San Miguel aña pasa cu tabata debi na aumento di awanan di riool y tambe un halto nivel na Bubaliplas pa via di awaseronan, ademas di un tardansa di implementacion di medidanan adecua pa mitiga e tipo di situacionnan aki.

Den esaki, nan ta papia no solamente di inundacionnan sino tambe di posibel consecuencianan bacteriologico y di contaminacion debi na un Bubaliplas disfuncional cu ta un peliger potencialmente importante pa e pueblo di Aruba, economia y naturalesa.

Bubaliplas su obhetivo specifico ta pa trata e awanan residual di tal manera di garantisa cu e producto cu ta descarga por cumpli cu e normanan internacional y legal.

Pa FPNA e situacion, cu mester recorda tabata di aña pasa, tabata di preocupacion hasta cu lo construi y apertura un Bubaliplas nobo na 2028 e cual lo soporta e aumento di poblacion y maneho di turismo pero “e situacion ta inaceptabel, tanto pa e poblacion como pa nos, pa turismo y naturalesa, lastimamente pa protege salud publico a dicidi di habri sluisnan pa lama, algo hopi di desea dado e desplasamento y incluso propagacion di e problema tanto directo como indirectamente cu consecuencianan cu na largo plaso por ta dificil di calcula y di supervisa.”

Nan a referi na e rapport di CARMABI “Coral Reefs Baseline Study for Aruba (2019)” den e cual na pagina 54 ta indica cu “debi na e gravedad di y multitud di factor cu ta contribui na e dañonan di coral na Aruba (por ehemplo formanan di contaminacion, overfishing y awanan residual) e obhetivonan mester wordo defini pa refleha scala di e factornan aki y asina diseña strategianan significativo pa disminui e daño generalisa na e coralnan di Aruba “limita entrada di contaminantenan for di tera, por ehemplo, a traves di un infrastructura mehora di awa di yobida loke ta limita entrada di awanan residual na lama, ademas di un aplicacion mas eficaz di normanan y leynan, areanan grandi di prohibicion di piscamento pa permiti e recuperacion di comunidad di piscanan na isla.

Cu e carta aki di fecha 17 di november 2022 a pidi pa atende cu URGENCIA y tuma medidanan preventivo pa soluciona den corto y mediano plaso e situacion tanten lo tin un planta nobo.

Asina mes, nan a señala cu durante diferente reunion lidera pa ex-Rampenbureau cu awor ta Crisis Management Office (CMO), FPNA a keda obliga di haci varios pago pa asumi e costonan tanto di DOW como di Departamento di Salud Publico (DVG) debi na falta di presupuesto, tambe pa asina evita cu e situacion -na e momento ey- por a bira mas pio ainda.

“E base pa conservacion di naturalesa mester tin respaldo di un gestion y un diseño adecua di procesonan operativo, cu presupuesto, gestion di riesgo y prevencion di crisis di parti di Gobierno.” E carta tabata señala.

Pa soluciona e problema FPNA a duna diferente solucion como por ehemplo un planta mobil nobo hasta cu esun di Bubaliplas lo keda cla na 2028, instalacion di un di dos bomba na “TDS bak” di RWZI pa por pomp durante 24 ora, instalacion di un bomba di emergencia for di Bubaliplas te TDS bak, renobacion di rioolnan y tuberianan cerca di hotelnan, ampliacion di e tubo di Tierra del Sol pa evita cu e canal por drenta directamente na Saliña Druif, lanta parti di caminda di San Miguel cu a inunda caba teniendo na cuenta ROP, durante awaseronan fuerte un sistema di prevencion di emergencia pa asina duna awa na organisacionnan of companianan cu ta eherce agricultura, pa permiti na DVG conhuntamente cu Directie Natuur en Milieu (DNM) haci analisisnan completo pa haci un plan di siguimento cu circuitonan di ‘feedback loops’.

Pa finalisa, nan a expresa nan preocupacion grandi pero tambe nan boluntad pa haya solucionnan “ta fundamental pa Aruba haya resultadonan optimo den corto plaso desaroyando un politica di gestion di crisis di RWZI y alivio di desasternan pa asina garantisa siguridad general di e bida y salud di e poblacion, naturalesa y economia.

Dia 15 di november ultimo por a mira un comunicado di Gobierno di Aruba indicando cu despues di yobida di ultimo dianan e volumen di awa cu a acumula den Bubali Plas a yega na un nivel critico. Na e momentonan aki no tin capacidad den e plas mes pa sigui retene tanto awa y tampoco ta responsabel pa laga e nivel sigui subi y desborda den vecindario. “Esaki ta un situacion di emergencia pa cual Gobierno, den coordinacion cu tur departamentonan concerni, incluyendo oficina di maneho di crisis, a analisa tur opcion y a keda nada otro cu aproba pa habri e sluisnan di emergencia temporalmente pa asina baha e nivel di e awa den Bubali Plas.”

Atencion pa situacion na Bubaliplas desde basta tempo capacidad di procesa ta demasiado chikito y ademas falta di mantenimento di tuberia, entre otro entre high rise y Bubali, a kibra y awa sushi ta bin halto. E tuberia tin por lo menos 30 aña sin cambia y e problemanan ta keda montona. E carta aki di FPNA ta demostra esey. Un aña pasa FPNA a adverti gobierno di e situacion urgente y un aña despues, atrobe cu yobida y falta di capacidad, nos tin e mesun situacion, ademas e agravante di situacion di e tuberia.