Ayera mainta trempan, muchanan a bolbe yena e edificio y pleinnan di scol cu nan entusiasmo y alegria: un aña escolar nobo ta cuminsa.
Despues di un descanso bon mereci durante vakantie, e muchanan ta back pa continua nan educacion pa asina nan ta bon prepara pa contribui na un sociedad inteligente, sano y productivo den futuro.
Bon Dia Aruba a bishita Arco Iris Kleuterschool, Rosario College, Scol Preparatorio Sabana Basora y Colegio Santa Famia pa haya un bista di e atmosfera pa e aña escolar nobo, unda por a mira hopi di e muchanan cu sonrisa riba nan cara y e alegria di wak nan amiguitonan di scol y nan maestronan atrobe.
Bon Dia Aruba ta desea tur mucha, maestro y mayornan hopi sabiduria, forsa y bon suerte pa un aña exitoso!
