Problema di violencia domestico y agresion den diferente forma contra hende muhe ta uno latente den nos comunidad.
Minister di Asunto Social, sr. Paul Croes a declara na Bon Dia Aruba cu lamentablemente berdad awe aki na Aruba pero rond di mundo, hende muhe ta bira victima di abuso. Nan ta abuso domestico rond di hende muhe pa 99% tin un mucha tambe cu ta keda envolvi den e abuso aki sea fisico, emocional, mental, etc…
“Pa motibo cu na momento bo mira cu bo mama ta wordo maltrata e ta un abuso traumatico tambe pa un mucha. Sin conta e efecto cu e mama mes”, el a bisa.
E mandatario ta lamenta cu tin hende homber ainda den nos sociedad cu ta pone den nan cabes pa haci esaki sin mira e consecuencia grandi cu esaki tin pa hende muhe cu ta sufri abuso di hende homber.
Nan ta tur sorto di abuso cu tin biaha ta bay asina leu cu tin damanan cu ta keda sin bay traha locual ta trece su efecto riba productividad di comercio. Tambe e yiu ta keda envolvi y perhudica ya cu nan no ta bay scol pa motibo di esaki. “Kiermen e efecto riba un abuso contra un hende muhe ta enorme den nos sociedad”, el a bisa.
E mandatario a declara cu nos mester sigui bringa e problematica aki y conscientisa nos comunidad riba efectonan desastroso cu esaki por tin. E ta lamenta cu abuso a yega di bay asina leu te cu morto a cay den casonan asina, y esaki ta algo cu “nos pais no mester tolera”.
