“Ta momento pa habri scol bek” asina Minister Presidente, Evelyn Wever-Croes a bisa diaranson anochi. E prome fecha tentativo ta dia 18 di mei, caminda algun scol lo habri. Enseñansa ta cay den e lista di e sectornan y actividadnan cu lo habri pa e di dos nivel di flexibilisacion cu ta cuminsa dialuna awor. E lista aki ta wordo conoci awe y tambe e condicion adicional cu ta conta pa e nivel aki.

E anuncia haci pa premier Wever-Croes y no pa e minister titular di e cartera di Enseñansa, Ciencia Y Desaroyo Sostenibel tocante cu scol lo habri bek tentativamente dialuna awor, a bira un sorpresa. E decision aki a causa cantidad di reaccion specialmente di e mayornan.

E reaccion tabata dividi entre esnan cu ta pro y esunnan cu ta contra apertura di scol meymey di e pandemia di Covid-19. Algun di nan ta haya e decision aki hopi prematuro te hasta peligroso. Nan ta considera prudente cu scol por habri te otro aña escolar nobo cu ta cuminsa na augustus venidero, ya cu no ta falta mucho pa aña escolar (2019-2020) finalisa.

Otronan ta haya prome mandatario su decision prudente, semper cu lo wordo aplica protocol stricto di higiena y bio siguridad cu por protege y garantisa e muchanan su salud, y logicamente di tur esunnan rond di dje.

El a bisa cu e otro instancia manera, Traimerdia lo wordo prepara pa nan por habri bek 25 di mei proximo. Nan ta algun di e actividad cu lo cay den e nivel dos di flexibilidad di e shelter in place. E apertura di e actividad aki lo wordo evalua bon pa bin cu e rekisitonan necesario pa evita mas caso positivo di Covid-19.

E prome mandatario a trece diferente argumento cu a hiba pa tuma e decision aki. Un di nan tin di haci cu for di dia 13 di maart un 60% di e muchanan no haya les. Un cifra cu tabata desconoci. A pesar cu prensa a yega di confronta e mandatario di Enseñansa cu e cifra di muchanan cu tabata hayando les virtual.

Finalmente e prome mandatario a duna di conoce e cifra aki diaranson anochi. E mandatario di enseñansa ta boga pa un educacion a distancia. El ta haya cu e situacion cu nos ta pasando aden pa causa di e crisis di Covid-19 a bira un momento oportuno pa duna mas forsa na su iniciativa di promove un educacion haciendo uzo di plataforma digital.

Sinembargo premier Wever-Croes a enfatisa locual presidente di Asociacion di Dokternan di Cas (HAVA), Dr. Joaquin van Trigt a trece dilanti cu e riesgo di contagia cu e virus entre muchanan no ta grandi. Ademas e plamamento di e virus ta na un nivel hopi abao na Aruba. “Den e circunstancia aki gobierno di Aruba no por hustifica mas pa tene scolnan cera,” el a bisa.

Tambe el a argumenta cu tin diferente aspecto di tipo social, pero psicologico cu ta mustra e necesidad aki. Pasobra scol ta un luga sigur pa nos muchanan, mirando casonan di violencia domestico.

Pero apertura di scol mester tuma luga –segun e prome mandatario- cu reglanan stricto di higiena y bio siguridad. E ta un forma pa kita e miedo cu ta wordo expresa den comunidad. Nan lo traha protocolnan pa garantisa pa evita e contagio di e Covid-19.

Gobierno no ta haya cu no tin hustificacion mas pa tene scol cera. Casonan a baha y frontera ainda ta cera. Y nos mester adapta na e normal nobo y apertura di scol ta parti di dje. Pero intencion ta cu e muchanan cu a wordo perhudica por haya algo di les pa asina nan por ta mas prepara pa un aña escolar nobo.