Ayera mainta den su discurso di apertura, presidente di Asociacion Interamericano di Propiedad Intelectual (ASIPI), sra. Maria del Pilar Troncoso a gradici gobierno di Aruba y nan miembro local, Oficina di Propiedad Intelectual, pa nan apoyo y contribucion pa realisa nan seminario Contra Falsificacion cu a cuminsa formalmente ayera na Hilton Hotel.
Dilanti delegadonan di diferente pais rond mundo, sra. Troncoso a bisa cu esaki ta e prome biaha cu ASIPI ta haci presencia na Aruba. “Un pais cu un actividad turistico importante cu ta e motor di desaroyo di e isla”. El a laga sa cu e asociacion aki a bin Aruba cu un mensahe riba fortalecemento di e propiedad intelectual.
Impacto di Internet
“E falsificacion ta un practica cu ta bay over di e fronteranan nacional y cu ta involucra practica di delito na tur nivel”, segun e halto ehecutivo aki. Den su discurso el a declara cu e paisnan ta wordo afecta economicamente cu e benta di productonan falsifica entre nan remedinan, y tambe cada ciudadano su salud, integridad fisico y bienestar lo por resulta afecta. Un factor cu a hunga un rol riba e comercio legal di productonan falsifica ta Internet y Social Media. El a bisa cu e acogida di e sistema di inter comunicacion a hiba cu e “falsificacion sea un practica cada bes mas presente den e mercadonan”.
Un punto cu a hala basta atencion tin di haber cu e caso di industria di remedi. E benta di remedinan falsifica ta wordo calcula alrededor di 75 mil miyon dollar. E mesun Organisacion Mundial di Salud (OMS) ta calcula cu un 10% di e mercado mundial di remedi ta productonan falsifica. “Esaki ta refleha e berdadero peliger cu ta existi pa bida humano y deterioro di calidad di bida”, segun sra. Troncoso.
Retonan
Otro sector cu a resulta afecta cu e delito di falsificacion ta e industria di paña y acesorio. E industrianan aki a realisa inversion grandi pa fortalece nan marca, pero ta surgi persona y compania cu simplemente nan ta probecha cu e marca ta uno famoso of prestigioso pa falsifica nan productonan causando dañonan y perhuicio na e compania original.
Presidente di ASIPI a laga sa cu e retonan cu e doñonan di marca y nan abogadonan tin ta esun di con pa demostra y coregi e falsificacion, no solamente den e sectornan di remedi, paña y acesorio, sino den tur esfera economico. E invasion di productonan falsifica a conduci cu e paisnan y e doñonan di marca ta implementa esfuerso pa investiga riba origen di e productonan ilegal aki. Na 2014 un estudio realisa dor di Oficina di Representante Comercial di Merca a indica cu na Latino America tin 5 di e 11 paisnan identifica como principal fuente di productonan falsifica. Otro reto tin di haber cu e compilacion di evidencia cu lo por permiti pa lanta un caso pa practica ilegal di falsificacion conta esunnan cu ta haci’e.
“Nos ta conoce e retonan cu ta confronta e profesionalnan di Propiedad Intelectual. P’esey e seminario aki a wordo structura rond di un tema y programa cu ta abarca diferente area relaciona cu falsificacion”, asina presidente di ASIPI a conclui su discurso di apertura.
E seminario aki ta conclui awe. Durante e dos dia di debate entre ayera y awe, ASIPI ta spera di suministra informacion valioso, pero tambe lanta un pensamento critico y analitico rond di e problematica mundial di falsificacion.
