Diahuebs anochi ora cu pueblo Frances tabata celebrando su dia nacional di independencia nan a wordo sorprendi cu un di tres atentado terorista den nan propio teritorio durante e ultimo un aña y mei.
Consul honorario di Francia na Aruba, sr. Christian Mongellaz a condena e acto aki, y el a expresa cu pueblo Frances a cuminsa fada cu e situacion aki.
Solidaridad mundial
Un biaha mas mundo henter ta expresa su solidaridad y convivencia cu Francia su pueblo cu e ultimo tragedia aki cu a laga mas cu 80 morto y mas cu shen persona herida na Niza. El a recorda cu un aña pasa el a duna su prome entrevista na Bon Dia Aruba relaciona cu e atentado den e revista Charlie Hebdo na Paris cu tabata otro tragedia pa su pais.
E ta lamenta e serie di atentado aki contra Francia considerando cu su pais ta uno tolerante cu a yega di ricibi hendenan di cualkier parti di mundo, pero particularmente di e noord di Africa cu ta di mayoria Musulman. Cu un sentido di tristesa e ta declara cu esaki ta un situacion di “violencia cu nunca Francia a wak”.
El a gradici e maneho etico cu medionan di comunicacion a hiba den e tragedia ultimo aki caminda un ciudadano di nacionalidad Frances y di origen di Tunisia a dal mata y herida cantidad di hende cu un truck den un avenida masha concuri na Niza. El a bisa cu e cadaver su estado tabata horibel y indescribibel.
Ultra derecha
E echo cu un biaha mas Francia a bira victima di un ciudadano nacionalisa Frances y di origen Musulman, particularmente di Tunisia, lo por trece un brote di nacionalismo extremo.
Consul di Francia na Aruba, sr. Christian Mongellaz a laga sa cu su pais ta uno hopi habri pa hendenan di tur nacionalidad, pero nan por sinti cu ultimamente e sector politico di ultra derecha na Francia, y apesar cu mayoria di hende no ta di acuerdo cu nan, pero esaki ta un escogencia politico, ta ganando hopi voto y simpatia. E ta haya cu e simpatia cu ultra derecha di Francia ta hayando ta debi cu e “pueblo Frances ta un tiki fada…”.
Pero den su opinion personal e ta kere cu bo no por resolve un problema asina lihe. Pasobra e echo aki no tin di haber cu Francia so, sino den resto di Europa y Merca tambe, y otro paisnan di Medio Oriente , y na Turkia cu ta un pais Musulman, e situacion ta grave.
P’esey e ta referi cu religion mester uni e hendenan y no trece odio y discordia den un pueblo. “Esaki ta un asunto peligroso pa un pais cu un democracia como Francia cu e mayoria di pueblo por vota pa ultra derecha, y nos nunca a conoce un gobierno di ultra derecha”, el a bisa.
Pa e diplomatico Frances ta dificil di compronde e mentalidad di un hende asina cu a comete un tipo di acto asina. “Dios so por sa kico ta pasando den un mente di un persona asina”, el a bisa. E no sa si por ta existi un husticia na mundo cu lo por husga un acto asina. Pero e pregunta cu ta surgi ta: Te cuanto mester soporta?
Religion
El a referi tambe na e reciente atentado na Orlando unda un persona cu laso Musulman a atenta contra hende inocente. Tambe na e atentado na luna di november na Francia den e famoso Teatro Bataclan y den un “brasserie” cerca di stadion di Francia, cu a laga un cifra lamentabel di victimanan inocente tambe.
“Bo ta puntra bo mes: Esaki ta bay sigui? Te cuanto?”, el a expresa.
E ta kere cu e ayudo no por bini di un grupo di gobierno so, tampoco di organismonan di siguridad, sino di otro gobiernonan di mundo henter, tanto na Siria, Libanon, etc… pa para e tragedianan aki cu personal civil ta victima di dje.
El a referi na e parti di religion, ya cu grupo extremista como ISIS ta uza religion como parti di nan lucha. E diplomatico a cita cu un profeta di oriente a bisa: “Si e religion ta un fuente di discordia y odio, miho no tene religion” . El a cita esaki pasobra religion su reis Latin ta “union”, kiermen bo ta uni hende cu ta e fuente di religion.
Aunke no a wordo informa ainda si tin un grupo extremista tras di e atentado na Niza, pero mescos cu a pasa luna di november pasa na Francia, autoridad ta bin descubri despues cu e autor di e tragedia aki tabatin un link cu e atentado na Belgica y cu ISIS. E ta sigur cu e criminal di Niza lo tin relacion cu otro hendenan. E ta lamenta cu como ciudadano Frances, aunke di origen di Tunisia, e criminal aki por odia un pais cu a dune un miho oportunidad cu loke e por haya den su propio pais.
“Esey ta un cobardia pasobra bo no ta gradici un oferta cu un estado ta duna bo pa bo famia crece, bo yiunan bay scol, y bay dilanti”, el a señala.
Temor
Actualmente hopi hende tin miedo cu e serie di acontecimento terorista aki. Francia ta un pais turistico y no solamente su pais sino henter Europa tambe. E ambiente di miedo y insiguridad cu ta haci cu bo no por bishita y disfruta di un pais su beyesa, cultura y monumentonan, no por limita un hende pa tin liber acceso pa bishita otro pais.
“Nos ta den un periodo hopi tristo berdaderamente y hendenan ta busca contesta di un fenomeno asina”, el a declara.
E no por bisa cu nos ta den un situacion di guera ya cu e concepto di guera ta encera cu bo ta conoce bo enemigo. Pero relaciona cu e acontecimento na Niza caminda un hende tras di stuur di un truck pa 11’or anochi ta coriendo riba un caya popular cu monton di hende ta cana riba dje pa wak e show di klapchi dia di independencia di Francia, ta dal nan intencionalmente, ta mustra un odio inmenso. Ya cu nan ta kita bida di ser inocente, entre nan muchanan, y esaki ta un echo hopi tristo.
El a relata cu durante e acontecimento aki tabatin echo di burachi di motociclistanan cu a sigui e truck terorista y trata di para esey. Pero na Francia posesion di arma den personal civil ta ilegal, solamente polis por tene arma. Nan a purba di habri e porta di e truck ya cu e largura di e caya hopi concuri di hende ta dos kilometer y mey.
