Ultimo informacion cu a drenta via Departamento Meteorologico ta cu e tempo ta ubica mas o menos un 2.000Km Oost di Aruba, entre Caribe y Africa ainda. Un avion pa midi tempo a bula hopi den dje pero no a detecta un centro di circulacion. Algun areanan tin biento di tormenta tropical pero no kiermen cu e lo bira tormenta tropical. Segun sr. Mark Oduber di Departamento Meteorologico, ora bo haya un centro di circulacion defini, e ora bo ta haci esaki un depresion of tormenta tropical. ”Esey no tabata e caso, dus , el a keda manera cu e ta, un ola tropical fuerte.”
E indicacion di e modelonan si ta indica cu manera cu e ola tropical aki ta moviendo den un ruta West pa Oost/West, e por haya tiki forsa y desaroya. E indicacion ta cu , si e modelonan cu Departamento Meteorologico ta uzando ta bastante bon, (cual ta modelonan cu ta bao di recomendacion di Nacional Hurricane Center) si e ola tropical aki desaroya y haya centro di circulacion, esaki lo ta pa 150 pa 200Km Noord di aruba entre diahuebs laat pa dabierna. Esaki ainda ta keda un ola tropical cu mientras e ta desaroya, e ta bay trece awacero cu por ta hopi pisa cumisando diahuebs, biento y lama tambe lo bolter den un periodo di diahuebs pa diadomingo. E lama ta mustra cu lo bira un tiki ”brabo” dus ta bay tene extra vigilancia riba esaki.
