Kico a logra e aña aki?
Yegando na e ultimo edicion di nos editorial pa aña 2015, nos ta tira un bista riba loke nos a publica den e edicionnan cu a cuminsa sali durante e aña aki. Kico tabata e intencion cu e editorial aki? Sigui di un manera critico e eventonan di mayor interes riba tereno politico, economico y social den nos pais, cu un bista tambe riba e mundo rond di nos. Hopi atencion a bay na aspectonan cu den e noticia di tur dia talbes no ta bin dilanti, pero cu por cambia e manera cu nos ta contempla e eventonan aki. Hopi biaha e protagonistanan di noticia no tin interes pa e publico haya sa cierto detaye di e asunto, pa asina nan manera di presenta e asunto por prevalece. Esaki nos por yama algo casi natural den politica. Sinembargo, ta tarea di prensa pa completa e panorama mas tanto posibel pa e lector por ta ampliamente informa, sin cu necesariamente ta comparti e opinion di e periodista o medio di comunicacion. Nos ta kere cu nos a logra esey y lo continua den 2016 tratando di cumpli mas ampliamente posibel cu e tarea aki di informa, y no solamente transmitiendo opinion.
Kico den e aña aki tabata e enfokenan mayor? Gobernacion na Aruba, y su deficiencianan grandi den hopi aspecto. Por ta cu tin hende ta bisa:”Pero boso no ta cansa?” y e contesta ta “NO” y cu su motibo. E motibo principal ta cu un pueblo cu no por gosa di un gobernacion aceptabel lo sufri e consecuencianan den tur aspecto di bida. Y tin demasiado señal cu ta indica cu como ciudadano nos no por ta contento cu e nivel di gobernacion cu nos tin actualmente. Kico ta e cosnan cu ta capta nos atencion? Ban cuminsa cu bisa cu tin cos cu ta cana bon den e pais aki, pero hopi biaha esaki ta a pesar di gobernacion, y no gracias na esaki. Aunke nos a cay bek na solamente un pilar economico, e ta uno hopi fuerte. Esey lo mester keda asina y mester haci tur cos pa cuida esey. Na prome luga esey ta rekeri cu nos ta na vanguardia di cambio den e clima general di turismo mundialmente pa nos por adapta na tempo y di un manera cu ta cumbini nos. Ta bon por ehemplo pa realisa cu Aruba ta hopi competitivo den digitalisacion cu tin su efecto den turismo tambe. Pero nos no mester cera nos wowo pa e realidad cu e maneho anticua y hasta inhusto di nos autoridadnan di telecomunicacion ta impedi un desaroyo mas faborabel ainda. Inversionnan grandi den telecomunicacion ta paralisa pasobra autoridadnan concerni ta kere den proteccion di e compania nacional na un manera cu nan no por mantene. Ta cuestion di tempo pa nos haya caso den corte cu ta bay obliga e autoridadnan aki pa cambia nan maneho. Pero pakico e mester yega asina leu?
Otro aspecto importante unda mester mantene posicion ta den siguridad. Delincuencia na Aruba keto bay no ta na nivel malo di mayoria di nos bisiñanan, pero nos no mester tuma nos bisiña como cuadro di referencia. E turista cu ta bin Aruba pasobra e ta kere cu Aruba ta safe no ta interesa pa sa si Curaçao, Republica Dominicana of Venezuela tin mas delincuencia. Aki ta unda e actitud di e mandatario concerni no ta yuda, pasobra siendo ‘tough’ cu bo criticonan no ta mesun cos cu ser efectivo den atende e asuntonan pendiente. Como pais, nos mester por haci un miho trabao aki.
En general nos a presencia un aña unda e enfoke gubernamental tabata riba con pa ‘squeeze’ mas placa for di economia y cartera di e ciudadano sin cu haya un multitud protestando dilanti Oficina di Gobernacion y esey a logra tambe. Pero den e proceso a logra tambe desactiva parcialmente e motor economico y sector priva a hala atras pendiente di loke ta bay pasa. Y, pa corona obra, e problema mayor cu ta nos problema financiero gubernamental, ta leu di keda resolvi. Nos no ta mira nada otro cu un gobierno cu ta pusha mandando e problema pa futuro y hasta aumentando e debe cu proyectonan cu no tin prioridad, pero cu si mester cuminsa paga proximamente. Atrobe nos ta mira cu gobierno ta scoge e ‘easy way out’ poniendo enfasis kico ta haci pa pone mas placa den man di e ciudadano, pero no ta contesta e pregunta ta di unda e placa regala ey mester sali. E por sali di un economia anima y creciente, cu tin mas pa gobernacion tambe haya su parti. E factor intangible mas importante den esaki ta confianza. Confianza di sector priva cu gobernacion ta haciendo lo corecto pa habri caminda pa haci negoshi. Aki ta unda gobierno ta fayando ‘big time’ drechando nada y solamente creando mas obstaculo pa e empresario den maneho di su negoshi, chikito of grandi. Nos no a tende ningun mandatario haci promesa cu den 2016 lo haci un intento pa mehora esaki; probablemente e no ta ni den nan pensamento.
