Ultimo dianan poco hende a bay getest na Centro di Diagnostico; Tin pashent cu ta nenga di haci test di Covid-19

Tanto departamento di Salubridad Publico (DVG) como Minister Presidente, Evelyn Wever-Croes a yega di informa diamars ultimo, cu durante e ultimo dianan masha poco hende a bay getest pa Covid-19 na Centro di Diagnostico.

E prome mandatario a indica cu nan por a tuma nota cu durante e ultimo dianan aki ‘relativamente poco persona’ a bay test. Pero poco persona a yama tambe na Centro di Diagnostico, y el a recorda tur hende cu e test aki ta gratis y anonimo.

Tambe el a pidi bo yama ora cu bo por presenta un di e sintomanan, ya sea: tosamento seco, dolor di garganta, keintura y perdida di holo of smaak, pa asina bo por haya cita pa un test. Tin capacidad pa 330 test pa dia. “Si bo ta sinti algun di e sintomanan por fabor yama mesora,” el a bisa.

Miedo pa test.
Di su banda presidente di Asociacion di Dokter di Cas (HAVA), Dr. Joaquin Van Trigt a bisa cu actualmente ta wordo getest pashent cu tur tipo di sintoma relaciona cu Covid-19 y problema respiratorio.

Sinembargo nan por haya informacion cu tin pashent cu ta nenga di haci test pa diferente motibo. El a bisa cu por ta sea pa stigma of miedo di bay den isolacion of cualkier otro motibo. Pues e ta haya cu no mester tin miedo di papia riba caso di Covid-19, ya cu e por pasa nos tur.

Dr. Van Trigt ta urgi nos comunidad pa evita contagio innecesario y tambe pa e parti di control epidemiologico ta importante pa bay test. “Ta hopi importante pa identifica tur caso pa mantene e plamamento bao control,” el a bisa. Si bo tin algun di e sintomanan yama e call center 280-0101 y bo ta wordo atendi pa nan mesun assistentnan, entre 7’or di mainta cu 11’or, cu e backup di un grupo di dokternan di cas.

Tambe Dr. Van Trigt a trece dilanti cu tin personanan den isolacion of/y cuarentena cu no ta menciona esaki ora di busca atencion medico. El a pidi cu pa siguridad di tur hende ta importante pa e pashent duna tur informacion pa asina nan por tuma e precausionnan necesario. Ta esencial pa nan como dunado di cuido pa por atende e pashent cu e material di proteccion.

Den caso cu bo ta den isolacion of den cuarentena, laga otro hende busca e remedi pa bo. Of botica tambe por deliver e remedinan na cas, ora cu bo ta duna e informacion corecto aki. “Asina nos ta evita riesgonan innecesario,” el a bisa.